„Er allt í gulu á þínum vinnustað?“

Gulur september 1. september 2023 15:37

Willum Þór Þórsson, heilbrigðisráðherra ýtti átakinu Gulur september úr vör í Kringlunni í dag.

Átakinu Gulur september var formlega ýtt úr vör í dag af heilbrigðisráðherra og landlækni en Gulur september er samvinnuverkefni stofnana og félagasamtaka sem vinna saman að geðrækt og sjálfsvígsforvörnum.

Verkefninu er ætlað að auka meðvitund fólks um mikilvægi geðræktar og sjálfsvígsforvarna, og að vera til merkis um kærleika, aðgát og umhyggju.

Slagorðin; „Er allt í gulu?“ og ,,Er allt í gulu á þínum vinnustað?“ voru kynnt til sögunnar og eiga þau að vísa til samkenndar, þess að láta sig náungann varða og hlúa saman að geðheilsunni. Í dagskránni í ár er sérstök áhersla lögð á geðrækt á vinnustöðum.

Málefnið er brýnt

Íslandi deyja að meðaltali 39 einstaklingar í sjálfsvígi, á ári.
Yfir helmingur allra sjálfsvíga á sér stað fyrir 50 ára aldur.
Sjálfsvígstíðni er tvöfalt hærri, í heiminum, meðal karla en kvenna.
Áætlað er að um 703.000 manns deyi árlega í sjálfsvígum, á heimsvísu.
Aðdragandi sjálfsvígs getur verið þungur og sár.
Hvert sjálfsvíg hefur áhrif langt út fyrir innsta hring hins látna. Rannsóknir sýna að sjálfsvíg hefur mikil áhrif á um 135 manns.
Aðstandendur takast á við krefjandi tilfinningar eins og sektarkennd og höfnun, úrvinnsla áfalls og sorgar er flókin.

Að undanförnu hefur Gulur september verið kynntur meðal félagasamtaka, stofnana og fyrirtækja og undirbúningshópurinn vonast til að fólk geti tekið höndum saman um málaflokkinn.

Hvernig hægt er að taka þátt?

Klæðast GULU og skreyta með GULU í september.
GULAR vörur og fatnaður í forgrunni í verslunum.
Afsláttur af GULUM vörum.
GULUR dagur, 7.september, þann dag eru allir hvattir til að klæðast GULU.
Deila myndum af „GULRI“ stemmingu og nota þar sem við á #gulurseptember.
Mæta á viðburði, taka þátt í dagskrá GULS september.
Fjalla um um málefni GULS mánaðar.

Að verkefninu um gulan september standa fulltrúar frá: Embætti landlæknis, Geðhjálp, Heilsugæslu höfuðborgarsvæðisins, Minningarsjóði Orra Ómarssonar, Píeta samtökunum, Rauða krossi Íslands, SÁÁ, Sorgarmiðstöð, Þjóðkirkjunni og Þróunarmiðstöð heilsugæslunnar.

Heilsa Geðheilbrigði

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.