Segja Bankman-Fried lifa á vatni og brauði í tugthúsinu

Kjartan Kjartansson skrifar 22. ágúst 2023 15:32

Sam Bankman-Fried stýrði FTX sem var um tíma þriðja stærsta rafmyntakauphöll heims. Fyrirtækið varð gjaldþrota með tilþrifum síðasta haust. AP/Bebeto Matthews

Verjandi Sam Bankman-Fried, stofnanda fallna rafmyntafyrirtækisins FTX, sagði að hann lifði aðeins á vatni og brauði í fangelsi vegna þess að honum væri ekki boðið upp á veganfæði þar. Bankman-Fried neitaði sök þegar saksóknarar lögðu fram uppfærða ákæru á hendur honum í dag.

Fyrrverandi milljarðamæringurinn er enn ákærður fyrir stórfelld fjársvik í uppfærðu ákærunni sem var lögð fram fyrir alríkisdómstól í New York í dag. Saksóknarar saka hann um að stela milljörðum dollara af innistæðum viðskiptavina FTX og veita þeim til vogunarsjóðs sem hann átti og hafði tapað miklu.

Hann er ekki lengur ákærður fyrir að brjóta lög um framlög til stjórnmálaflokka þar sem yfirvöld á Bahamaeyjum sem framseldu hann í desember mótmæltu því. Saksóknarar segja að þeir ætli engu að síður sýna fram á að hann hafi notað um hundrað milljónir dollara af fénu sem hann skaut undan til þess að kaupa sér áhrif hjá stjórnmálamönnum.

Fær hvorki lyf né mat við hæfi

Dómarinn í málinu úrskurðaði að Bankman-Fried skyldi vistaður í fangelsi fram að réttarhöldunum í október fyrir tilraunir til þess að hafa áhrif á vitni á dögunum.

Lögmaður hans sagði fyrir dómi í dag að hann lifði aðeins á vatni og brauði vegna þess að hann vildi halda sig við veganfæði. Fangelsið hefði ekki orðið við óskum hans um það, að því er segir í frétt Reuters.

Þá hefðu fangelsisyfirvöld ekki útvegað honum ofvirknilyfið Adderall þrátt fyrir að dómstóll hefði skipað fyrir um það. Hann ætti enn fremur lítið eftir af þunglyndislyfi sem hann tekur. Allt þetta torveldaði Bankman-Fried í að taka þátt í undirbúningi málsvarnar sinnar.

Fangelsið í Brooklyn í New York þar sem Bankman-Fried er haldið er alræmt fyrir lélegan aðbúnað fanga. Skipaðir verjendur hafa lýst aðstæðum þar sem „ómannúðlegum“.

FTX var þriðja stærsta rafmyntakauphöll heims áður en hún varð gjaldþrota með hvelli síðasta haust. Viðskiptavinir gerðu hliðstæðu bankaáhlaups á fyrirtækið eftir fréttir af vafasömum tengslum kauphallarinnar við Alameda Research, vogunarsjóð Bankman-Fried.

Eftir gjaldþrotið var Bankman-Fried ákærður fyrir að flytja milljarða dollara út úr FTX til að halda Alameda Research gangandi. Fall Bankman-Fried var hátt en hann hafði keypt sér umtalsverð áhrif og verið álitinn nokkurs konar undrabarn eða gúrú í rafmyntaheiminum.

Gjaldþrot FTX Bandaríkin Erlend sakamál Vegan

Tengdar fréttir

Notaði stolið fé til að gefa milljarða fyrir þingkosningarnar

Bandarískir saksóknarar segja að Sam Bankman-Fried, stofnandi fallna rafmyntafyrirtækisins FTX, hafi notað meira en þrettán milljarða króna sem hann stal af viðskiptavinum fyrirtækisins til þess að styrkja stjórnmálaflokka fyrir þingkosningar í fyrra. Hann hafi skipað undirmönnum sínum að fela slóð peninganna.

15. ágúst 2023 09:18

Rafmyntakóngur í steininn fyrir að reyna að hafa áhrif á vitni

Sam Bankman-Fried, stofnandi rafmyntafyrirtækisins FTX, verður vistaður í fangelsi í Brooklyn fram yfir réttarhöldin yfir honum eftir að hann varð uppvís að því að reyna að hafa áhrif á framburð vitna. Fangelsið er sagt alræmt fyrir slæman aðbúnað fanga.

14. ágúst 2023 10:50

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir