Viðskipti innlent

Play bætir við á­fanga­stað í Þýska­landi

Máni Snær Þorláksson skrifar
Forstjóri Play segir flugfélagið vera vel í stakk búið til að stækka leiðakerfið.
Forstjóri Play segir flugfélagið vera vel í stakk búið til að stækka leiðakerfið. Vísir/Vilhelm

Flugfélagið Play hefur hafið miðasölu á áætlunarferðum til Frankfurt í Þýskalandi. Forstjóri Play segir félagið vera vel í stakk búið til að stækka leiðakerfið. Fyrsta flug Play til þýsku borgarinnar er áætlað í desember á þessu ári.

Að því er fram kemur í tilkynningu frá Play er flugfélagið að stækka tengiflugsleiðakerfi sitt enn frekar með því að bæta við Frankfurt. Áfangastaðurinn mun tengjast við aðra áfangastaði félagsins í Norður-Ameríku, það eru Boston, Baltimore, New York og Washington DC í Bandaríkjunum og Toronto í Kanada.

Þann 14. desember næstkomandi á fyrsta flug Play til Frankfurt að fara fram. Eftir það verður flogið að jafnaði fjórum til fimm sinnum í viku yfir veturinn. Flogið verður til Frankfurt alþjóðaflugvallarins sem er í um tuttugu mínútna fjarlægð frá borginni.

„Það er frábært að geta bætt enn frekar við tengiflugsleiðakerfið okkar nú þegar eftirspurn í Norður-Ameríku eftir flugi yfir Atlantshafið er mikil,“ er haft eftir Birgi Jónssyni, forstjóra Play, í tilkynningu.

Birgir segir tekjur af farþegum sem koma frá Norður-Ameríku vera mun hærri en áður og því sé þetta góður tími til að bæta enn frekar framboðið á þeim markaði.

„Með tíu farþegaþotur í yngsta flota Evrópu erum við vel í stakk búin til að stækka leiðakerfið okkar og skapa um leið tekjur í góðu jafnvægi við kostnað.f“

Fréttir af flugi Play Þýskaland Keflavíkurflugvöllur


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið