Haukadalsvatn kraumaði að sjóbleikju

Við erum að fá sífellt fleiri fréttir af góðri sjóbleikjuveiði á vesturlandi og vestfjörðum og virðast flest vötnin og árnar þar núna vera að fá mjög sterkar göngur. Eitt af þeim veiðisvæðum sem er að gera það gott er Haukadalsvatn en Hjörleifur Steinarsson sölustjóri SVFR var einmitt að koma úr vatninu og sendi okkur smá pistil um þetta magnaða vatn.

"Ég var við Haukadalsvatn síðastliðna helgi, skemmst er frá því að segja að vatnð kraumaði af nýgenginni sjóbleikju.  Byrjaði á laugardagsmorgninum í blankalogni með þurrflugu og fékk strax nokkrar mjög fallegar bleikjur 41-44cm. svo fór að kula og ég skipti yfir í littla kúluhausa  no 14-16.  Fékk mjög góða veiði á púpurnar líka, endaði á að landa 25 bleikjum þann daginn, hirti nokkrar á grillið en sleppti svo helling. Veiddi svo aðeins á sunnudagsmorgninum og það var sama sagan, mokveiði. Landaði 5 á hálftíma og var orðinn helsáttur, fórum svo glöð inn á Búðardal og fengum okkur ís áður en við renndum heim á leið. Haukadalsvatnið tók vel á móti okkur og svei mér þá ef ég er ekki búinn að eignast nýtt uppáhaldsvatn!"