Lohan og fleiri stjörnur látnar borga fyrir rafmyntarauglýsingar

Kjartan Kjartansson skrifar 23. mars 2023 08:58

Lindsay Lohan þáði fé fyrir að auglýsa rafmyntir á samfélagsmiðlum en hélt því leyndu fyrir fylgjendum sínum. AP/Charles Sykes/Invision

Leikkonan Lindsay Lohan og rapparinn Akon eru á meðal nokkurra stjarna sem gerðu sátt við bandaríska verðbréfaeftirlitið vegna ásakana um að þær hafi auglýst fjárfestingar í rafmyntum án þess að upplýsa að þær fengju greitt fyrir það. Þær þurfa að greiða tugi þúsunda dollara hver.

Verðbréfa- og kaupþingsnefnd Bandaríkjanna (SEC) kærði hóp þekktra einstaklinga fyrir alríkisdómstól í New York og sakaði þá um að hafa fengið greitt fyrir að auglýsa rafmyntirnar Tronix (TRX) og BitTorrent (BTT). Ekki kom fram í samfélagsmiðlafærslum Lohan eða annarra að þau fengju greitt fyrir að mæra myntirnar.

„Þannig var almenningur blekktur til þess að trúa því að þessar stjörnur hefðu óvilhallan áhuga á TRX og BTT og væri ekki aðeins talsmenn þeirra á launum,“ sagði í kærunni.

Auk Lohan og Akon gengust tónlistarmennirnir Ne-Yo og Lil Yachty, boxarinn og netstjarnan Jake Paul og klámleikonan Michele Mason undir sáttina. Rapparinn Soulja Boy og poppsöngvarinn Austin Mahone voru hluti af máli SEC en þeir hafa ekki gert sátt við stofnunina, að sögn AP-fréttastofunnar.

Gangast ekki við brotunum

Engin stjarnanna þarf að viðurkenna brot sín samkvæmt samkomulaginu við SEC. Þær þurfa hins vegar saman að greiða um 400.000 dollara, jafnvirði rúmra 55 milljóna króna, í sekt og til að skila illa fengnum fjármunum.

Talskona Lohan segir að hún hafi ekki vitað af því að hún þyrfti að upplýsa um greiðslurnar sem hún fékk. Hún hafi fallist á að greiða sekt til þess að leysa málið. Með samkomulaginu þarf hún að endurgreiða þóknunina upp á tíu þúsund dollara, auk vaxta og þrjátíu þúsund dollara sektar. Það er jafnvirði meira en fimm og hálfrar milljónar króna.

Fleiri stjörnur hafa brotið lög með því að upplýsa ekki um hagsmunatengsl sín á þennan hátt. Kim Kardashian féllst á að greiða einnar milljónar dollara sekt fyrir að mæla með rafmyntinni Ethereum Max við milljóni fylgjenda sinna á Instagram án þess að gera þeim ljóst að hún fengi greitt fyrir það í haust. Leikarinn Steven Seagal þurfti að greiða meira en 300.000 dollara í svipuðu máli árið 2020.

Rafmyntir Auglýsinga- og markaðsmál Bandaríkin Efnahagsbrot Hollywood

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.