Lífið

Förðunar­fræðingur Hail­ey Bieber leysir frá skjóðunni

Elma Rut Valtýsdóttir skrifar
Hailey Bieber er alltaf óaðfinnanlega förðuð.
Hailey Bieber er alltaf óaðfinnanlega förðuð. Getty/Axelle/Bauer-Griffin

Það má gera ráð fyrir því þessa dagana að allt sem fyrirsætan Hailey Bieber gerir verði að tískubylgju. Nýjasta æðið er sérstök förðunartækni sem förðunarfræðingur Bieber notast við þegar hún farðar hana.

Mary Phillips er einn af förðunarfræðingum stjarnanna. Phillips hefur verið í bransanum í fjölmörg ár og hefur farðað konur á borð við Kim Kardashian, Jennifer Lopez, Kendall Jenner og síðast en ekki síst Hailey Bieber. 

Síðustu ár hefur Hailey Bieber verið ein helsta fyrirmynd ungra kvenna þegar kemur að tísku og útliti. Hún þykir einstaklega smekkleg og flestallt sem hún gerir kemst í tísku, hvort sem það snýr að klæðaburði, hári, nöglum eða förðun. Hinar frægu Hailey Bieber neglur hafa til að mynda verið það heitasta í rúmt ár og virðist ekkert lát ætla að vera á vinsældum þeirra.

„Öfug“ förðun sem slegið hefur í gegn

Bieber er þekkt fyrir náttúrulega og látlausa förðun þar sem mikil áhersla er lögð á ljómandi og lýtalausa húð. Bieber birtir reglulega myndbönd á TikTok síðu sinni þar sem hún sýnir hvernig hún farðar sig. Einhverjum hefur þó þótt þau myndbönd heldur óspennandi, þar sem Bieber þykist nota lítið sem ekkert magn af förðunarvörum á andlit sitt og því lítið af þessum myndböndum að læra.

Nú hefur förðunarfræðingur hennar hins vegar leyst frá skjóðunni og gefið upp þá tækni sem hún notar þegar hún farðar Bieber. Sú tækni hefur vakið mikla athygli, vegna þess að þetta er aðferð sem fáir hafa líklega prófað.

Phillips notast við svokallaða „öfuga“ aðferð. Hún er þannig að í staðinn fyrir að byrja á grunninum og fara svo út í smáatriðin, byrjar hún á smáatriðunum og setur grunninn svo yfir. Förum betur yfir þetta:

  1. Fyrsta skrefið er skygging. Phillips notar skyggingarstifti í dökkum lit sem hún setur undir kinnbeinin, undir kjálkann, meðfram nefinu og á þá staði sem hún vill skyggja til þess að ýkja beinabyggingu andlitsins.
  2. Því næst setur hún hyljara undir augun, í kringum munninn og nefið, á ennið og á þau svæði sem hún vill birta til.
  3. Þriðja skrefið er svo algjört lykilatriði. Phillips tekur stóran og mjúkan púðurbursta og dýfir honum í örlítið af farða og setur yfir allt andlitið. 
  4. Hún klárar svo húðina með því að setja kinnalit efst á kinnarnar og örlítið á nefið.

Kenndi aðferðina á TikTok

Hér fyrir neðan má sjá myndband Mary Phillips þar sem hún útskýrir aðferðina í stuttu máli. Eftir að Phillips birti myndbandið hefur þessi tækni farið eins og eldur í sinu um TikTok og keppist ungt förðunaráhugafólk um að endurgera lúkkið.

Bieber sýnir aðferðina sjálf

Hér má svo sjá Hailey Bieber nota aðferð Phillips þegar hún farðar sig sjálf. Hún virðist gera eitt öðruvísi en Phillips og það er að blanda örlitlu rakakremi út í farðann áður en hún ber hann á sig með mjúkum bursta. Það gerir farðann ennþá náttúrulegri og meira ljómandi. Að lokum setur hún svo örlítið púður undir augun, í kringum nef og á þá staði sem hún vill glansa minna.

@haileybieber the Mary P contour trick forever. Also - my best friend sings this song @justineskye Collide (Sped Up Remix) - Justine Skye

Tengdar fréttir

Hailey Bieber mögulega að setja á markað sitt eigið vörumerki

HI beauty teymið Heiður Ósk og Ingunn Sig, þáttastjórnendur Snyrtiborðsins, lifa og hrærast í heimi snyrtivara, förðunar og hárs. Í nýjasta pistlinum velta þær fyrir sér hvað sé að gerast hjá ofurfyrirsætunni Haylie Bieber, eiginkonu Justin Bieber. Við gefum þeim orðið.

Endurskapar Bieber nafnið: Ein stærsta tískufyrirmynd sinnar kynslóðar

Það er óhætt að segja að hin undurfagra Hailey Bieber sé ein helsta tískufyrirmynd ungra kvenna í dag. Stíll hennar er einstaklega töff en á sama tíma afslappaður og áreynslulaus, sem gerir það að verkum að auðvelt er fyrir hvern sem er að endurskapa hann.






Fleiri fréttir

Sjá meira


×