Viðskipti innlent

Ætla að flytja ís­lenskt vatn til frum­byggja í Kanada

Elísabet Inga Sigurðardóttir skrifar
Brad og Jón Ármann standa saman að verkefninu.
Brad og Jón Ármann standa saman að verkefninu. egill aðalsteinsson

Íslenskt vatn verður flutt út til frumbyggjabyggða í Kanada á næsta ári. Forsprakki verkefnisins segir að kanadísk yfirvöld muni fjármagna verkefnið í von um að bæta fyrir það sem miður hefur farið í mannkynssögunni.

Um er að ræða Kanadískt íslenskt samstarfsverkefni þar sem Íslendingar og frumbyggjar í Kanada hafa stofnað fyrirtæki sem hefur þann tilgang að flytja vatnið út.

„Við erum að reyna að byggja upp sjálfbæra lausn til að hjálpa frumbyggjum Kanada að fá aðgang að hreinu vatni, ekki bara til tafarlausrar notkunar heldur til langframa,“ segir Brad Loiselle , fyrir hönd frumbyggjaþjóðanna.

„Vegna þess að þar er ekki til ferskt vatn hjá sumum. Allt að fimm prósent þjóðarinnar þurfa að sjóða vatnið. Þetta vatn sem ég er með hér verður selt í beljum í gámum og fer beint í ísskápinn hjá fólki,“ segir Jón Ármann Steinsson, framkvæmdastjóri Icelandia ehf.

Laga það sem miður hefur farið

Unnið er að samningum um flutning á vatninu en ríkisstjórn Kanada mun fjármagna verkefnið.

„Samfélagslega séð er þetta mjög mikilvægt fyrir þessar þjóðir. Ríkisstjórn Kanada er að styrkja þau og laga það sem hefur miður farið í mannkynssögunni. Það held ég að sé mikilvægast því þetta fólk hefur verið afskipt. Sumir lengi,“ segir Jón.

Í stað þess að flytja út vatn í plastflöskum verða vatnsbeljur fluttar út í gámavís. Jón á von á því að frumbyggjar í Kanada muni njóta fyrsta sopans í lok næsta árs.

„Ég hef drukkið þetta vatn stanslaust síðan ég kom hingað, alltaf úr krananum, ég hef drukkið það stanslaust. Þetta er alveg dásamlegt vatn. Mér finnst það frábært og börnunum mínum líka. Við vorum að tala um að fá það á heimilið okkar og nota það í staðinn fyrir kranavatnið. Þetta er stórkostlegt vatn og að sjá það hreinsast þegar það rennur í gegnum hraun og að sjá hvað það er aðgengilegt hvar sem við förum er alveg ótrúlegt.“

Stærra en bara Kanada

Brad segir Kanada bara byrjunina.

Það eru mörg lönd í heiminum þar sem er vatnsskortur. Í sumum löndum er ekkert aðgengi að vatni, í Afríku og mörgum öðrum heimshlutum. Það er tækifæri hérna til að leysa vatnsvandamál víða um heim. Við byrjum á Kanada því við búum þar og þetta er mikilvægt fyrir okkur og vini okkar og félaga en þetta er stærra en bara Kanada.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.