Rafíþróttir

BLAST forkeppnin | Dusty á Norðurlandamótið | “Við erum langbesta liðið á Íslandi“

Snorri Rafn Hallsson skrifar
dusty blast

SAGA og Dusty tókust á í úrslitum Blast forkeppninnar í gærkvöldi. Dusty hafði betur 2–0.

Dusty þótti sigurstranglegra liðið þó leið þeirra á mótinu hefði verið erfiðari. Fyrir leikinn sagði JoeJoe, þjálfari SAGA, þó að meðbyrinn myndi hjálpa þeim, enda hafði SAGA þegar séð við Dusty 2–0 í upphafi móts. SAGA myndi mæta Dusty eins og hverjum öðrum andstæðing og þá gætu þeir klárað leikina.

Raunin varð hins vegar önnur.

Leikur 1: Mirage

Dusty hóf fyrsta leik kvöldsins í sókn og átti ekki í miklum vandræðum með að koma sprengjunni niður og láta hana springa. SAGA tókst aldrei að vinna meira en eina lotu í röð og gerði það þeim erfitt fyrir að komast á ról og spila sig inn í leikinn.

Staða í hálfleik Dusty 11 – 4 SAGA

Það var stutt í land fyrir Dusty í síðari hálfleik þegar liðið brá sér í vörnina. Dusty vann fyrstu tvær loturnar áður en SAGA nældi sér í eina. Næstu tvær féllu svo með Dusty áður en Detinate felldi þrjá leikmenn SAGA til að leggja sigurinn upp fyrir TH0R og B0nda sem lokuðu leiknum.

B0ndi var atkvæðamesti leikmaður leiksins með 27 fellur og 5 aðstoðarskot fyrir Dusty, en SAGA megin var Skoon efst á blaði með 15 fellur og 2 aðstoðarskot.

Lokastaða: Dusty 16 – 5 SAGA

Leikur 2: Ancient

Búist var við betri frammistöðu frá SAGA enda Ancient þeirra heimavöllur. Dusty hóf leikinn í vörn og vann fyrstu sex loturnar. SAGA náði að koma sprengjunni fyrir tvisvar en tókst ekki að koma í veg fyrir að leikmenn Dusty aftengdu hana. Sprengjan sprakk loks í 10. lotu en þá hafði SAGA þegar nælt sér í eitt stig en af síðustu fimm lotum hálfleiksins vann Dusty þrjár og SAGA tvær.

Staða í hálfleik Dusty 11 – 4 SAGA

Fyrri hálfleikur hafði spilast svipað og í leiknum á undan og það gerði sá síðari líka. Dusty vann fyrstu fjórar loturnar, SAGA krækti svo í eina, en TH0R lokaði leiknum í 21. lotu þegar hann kom sprengjunni fyrir og felldi ADHD. WZRD stóð þá einn eftir fyrir SAGA en þegar hann reyndi að aftengja sprengjuna sat TH0R fyrir honum og felldi.

TH0R var stigahæsti leikmaður Dusty með 22 fellur og 1 aðstoðarskot en WZRD efst á blaði SAGA með 14 fellur og 4 aðstoðarskot.

Lokastaða: Dusty 16 – 5 SAGA

Dusty stóðu því uppi sem sigurvegarar í einvíginu og mótinu öllu. Dusty tekur því þátt í Pelajaat.com Nordic Masters keppninni næsta vor, en það er líka undankeppni fyrir BLAST Premier mótið.

Þjálfari Dusty, Kruzer, var að vonum ánægður með liðið og sigurinn: „Þetta var flott hjá okkur og þeir eru enn og aftur að sýna og sanna af hverju þetta er langbesta lið Íslands.“


Tengdar fréttir

BLAST forkeppnin: SAGA í úrslitin

Tveir leikir fóru fram í BLAST forkeppninni í gær og unnu SAGA og Dusty sína leiki gegn xatefanclub og Ármanni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.