Myndband: Dodge ætlar að framleiða háværa rafbíla

Kristinn Ásgeir Gylfason skrifar 21. ágúst 2022 07:00

Raf-hugmyndabíllinn Dodge Charger Daytona SRT.

Ameríski bílaframleiðandinn Dodge hefur í gegnum tíðina framleitt bíla sem flestir ganga fyrir stórum V8 vélum sem framleiða hávaða. Nú eru straumhvörf yfirvofandi og Dodge ætlar að rafvæða framboð sitt. Dodge ætlar þó að halda fast í einkenni sín, gírskiptingar og hávær útblásturshljóð verða meðal þess sem rafvædd framtíð ber í skauti sér ef marka má nýjan hugmyndabíl frá Dodge.

Dodge Charger og Challenger munu hætta í framleiðslu á næsta ári í núverandi mynd. Hugmyndabíllinn sem kynntur var á dögunum. Sá ber heitið Dodge Charger Daytona SRT og er sambærilegur í útliti og bíll sem verður settur á markað árið 2024. Hann mun þá vera liðsauki fyrir Dodge Hornet, nýjan jeppling sem verður tengiltvinnbíll og er væntanlegur á markað í lok árs.

Charger Daytona er með púströr sem framkalla hávaða og gírskiptingu sem skiptir um gíra. Hvorugt er nauðsynlegt í rafbíl. Dodge er að reikna með að kaupendahópur þeirra sé hvort eð er ekki að leita einungis að því sem þarf, heldur spennandi kostum að sögn framkvæmdastjóra Dodge, Tim Kuniskis.

„Við teljum að við séum að koma með bíl á markað sem neytendur áttu ekki von á. En þeir munu klárlega heyra hann nálgast,“ bætti Kuniskis við.

Bíllinn gefur frá sér lágar drunur sem eru eins og háspennu raftækjabúnaður. Hljóðin koma ekki úr hátölurum eins og hljóð flestra rafbíla heldur er lofti beint í gegnum pípur sem eru hannaðar til að framkalla hljóð. Bíllinn getur skapað allt að 126 desíbela hávaða, sem samsvarar um það bil þegar þota tekur á loft.

Vistvænir bílar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.