Bílar

Red Bull RB17 verður 1250 hestafla ofurbíll

Kristinn Ásgeir Gylfason skrifar
Eina hönnunin af RB17 sem Red Bull hefur gefið út.
Eina hönnunin af RB17 sem Red Bull hefur gefið út.

Red Bull liðið í Formúlu 1 ætlar að smíða RB17 sem er hannaður af hönnunargoðsögninni Adrian Newey. Bíllinn verður með V8 tvinn-vél. Framleiðsla hefst árið 2025.

Bíllinn er aðallega hugsaður sem brautardagabíll fyrir velefnað fólk, en hann mun kosta 5 milljónir punda, eða um 813 milljónir króna. Samkvæmt Christian Horner, framkvæmdastjóra og liðsstjóra Red Bull verður bíllinn hugsanlega hannaður til að vera löglegur á götum úti.

Einungis 50 eintök verða smíðuð, 15 á ári og þegar hafa pantanir borist fyrir flesta þeirra. Horner hefur lýst bílnum sem afurð þess að gefa Adrian Newey lausan tauminn til að nýta sköpunargáfur sínar og hæfileika til hins ítrasta án allra takmarkana. RB17 er náttúruleg þróun frá Aston Martin Valkyre. Afhendingar á Valkyre hófust nýlega.

Adrian Newey og Christian Horner stýra gangi mála hjá Red Bull, en Newey er aðalhönnur liðsins og Horner framkvæmdarstjóri.Mynd: Getty Images

Nafn bílsins er áhugavert. Red Bull Formúlu 1 liðið kallar bíla sína alltaf RB og svo hlaupandi tala. Þegar kórónaveirufaraldurinn olli frestun tímabilsins í Formúlu 1 árið 2020 þá var yfirvofandi reglubreytingum ársins 2021 frestað til að spara Formúlu 1 liðum peningana sem nýr bíll kostar og til að tryggja að öll lið væru klár í keppni þegar fyrsta keppni fór loksins fram. Reglubreytingin tók gildi við upphaf yfirstandandi tímabils. Red Bull sleppti því úr tölunni 17, en bíll ársins 2020 var RB16 og því hefði bíll ársins 2021 alla jafna verið RB17 en af því að breytingin á milli áranna 2020 og 2021 var svo lítil kallaði Red Bull bíl sinn RB16B.

„Hann mun hljóma hrikalega vel, eins og brautarbíll á að hljóma,“ sagði Horner. Aðspurður hvort þetta sé fyrsta skrefið í átt að því að Red Bull verði götubílaframleiðandi svaraði Horner „þetta er upphafið af ferðalagi. Þetta er spennandi upphafsreitur fyrir okkur. Maður á aldrei að segja aldrei, en þetta er tilraunaverkefni fyrir okkur.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.