Hamilton kveðst klár í slaginn þrátt fyrir bakmeiðsli

Hamilton varð fjórði í mark í Bakú um helgina en aðeins félagi hans á Mercedes, George Russell, og Sergio Pérez og Max Verstappen, báðir á Red Bull, voru á undan honum í mark.

Bakmeiðsli voru að stríða Hamilton á meðan kappakstrinum stóð og eftir hann. Hann þurfti meðal annars hjálp við að stíga upp úr bíl sínum að keppni lokinni.

Toto Wolff, liðsstjóri Mercedes, viðurkenndi að mikið hoss á Mercedes-bílnum hefði þessa hliðarverkun í för með sér. Mercedes hóf tímabilið afleitlega, þar sem téð hoss á bílnum olli vandræðum, en hafa bætt árangurinn undanfarnar vikur.

„Gærdagurinn var erfiður og ég átti í einhverjum vandræðum með að sofa en vaknaði jákvæður í morgun. Bakið er aumt og marið en það ekkert sem betur fer ekki alvarlegt. Ég hef sinnt nálustungum og sjúkraþjálfun með Ang [sjúkraþjálfari hans Angela Cullen] og er á leið að hitta liðið til að vinna að frekari bætingu. Við þurfum að berjast áfram,“ er á meðal þess sem Hamilton sagði í sögu (e. story) sinni Instagram þar sem hann staðfesti jafnframt að hann yrði á meðal keppenda í næsta kappakstri sem fer fram í Kanada um helgina.

Hamilton rétt missti af heimsmeistaratitlinum í hendur Max Verstappen í lokakeppni síðasta tímabils. Hann er langt frá því að keppa um titilinn í ár en hann er sjötti í keppni ökuþóra með 62 stig, heilum 37 stigum á eftir liðsfélaga sínum George Russell sem er fjórði með 99 stig.

Heimsmeistarinn Verstappen leiðir keppni ökuþóra með 150 stig eftir sigur sinn um helgina en liðsfélagi hans Pérez er með 129 stig.