Nýjar hug­myndir og nýir frum­kvöðlar í nýrri hring­rás

Háskólinn á Akureyri, Háskólinn á Hólum og nýsköpunarklassinn Norðanátt standa fyrir keppninni, sem nefnist Norðansprotinn. Markmiðið er að ná til þeirra sem eru með hugmynd að nýsköpun á sviði matar vatns og orku.

Á síðasta ári hóf Norðanátt leit að frumkvöðlum og nýsköpunarfyrirtækjum á Norðurlandi sem leggja áherslu á fyrrgreind svið. Hófst það á svipaðan hátt og nú þar sem kallað var eftir áhugaverðum hugmyndum.

Þeirri hringrás lauk í mars á stórri fjárfestahátíð á Siglufirði þar sem frumkvöðlarnir sem voru valdir til áframhaldandi þátttöku gafst kostur á að kynna fyrirtæki sín og hugmyndir fyrir fjárfestum.

Nú er þetta ferli að fara aftur af stað með nýjum frumkvöðlum og nýjum hugmyndum, allt á sviði matar, vatns eða orku.

„Við byrjuðum þetta í fyrra og þá höfðu ekki margir trú á því að við gætum keyrt einhverja þrjá viðburði sem tengjast nýsköpun og frumkvöðlum hér. Þau höfðu rangt fyrir sér, í dag erum við komin með þrjátíu frumkvöðla sem eru allir að vinna með þemað matur, orka, vatn,“ segir Sesselja Barðdal Reynisdóttir, framkvæmdastjóri Eims sem er einn af skipuleggjendum keppninnar.

Gæti orðið stökkpallur

Sex hugmyndir hafa verið valdar til að kynna hugmyndir sínar fyrir dómnefnd á sérstökum viðburði í Háskólanum á Akureyri klukkan 16.00.

Liðin sem kynna sína hugmynd á lokaviðburð Norðansprota eru:

• Roðleður
• Tólgarsmiðjan
• Pelliscol
• Ylur
• Nordic Wine & View
• Ísponica

Þar þurfa þau að sannfæra dómnefndina um ágæti hugmyndarinnar.

„Þetta er svona lyfturæða. Þau þurfa að vera ótrúlega hnitmiðuð og fókuseruð og selja okkur hugmyndina á þremur mínútum,“ segir Sesselja. Fimm hundruð þúsund krónur eru í boði fyrir bestu hugmyndina. Einnig dýrmæt reynsla og ýmsir möguleikar sem gætu opnast.

„Þetta er tækifæri fyrir þau að prufa að fara í frumkvöðlasætið. Í fysta lagi er það alltaf að koma hugmyndinni úr hausnum á sér og niður á blað, það er fyrsta skrefið. Svo ef að þau finna sig í þessu í dag þá hafa þau tækifæri fyrir að vera meira með okkur í hringrásinni,“ segir Sesselja.

„Taka næst þátt í Vaxtarrými sem er viðskiptahraðall, svo er fjárfestahátíð á Siglufirði í lok mars, þannig að við ætlum að reyna að halda í frumkvöðla og hjálpa honum á mismunandi hugmyndastigi. Þetta gæti orðið flottur stökkpallur fyrir ákveðna einstaklinga,“ segir Sesselja.

Þá er einnig stefnt að því að auka aðkomu háskóla á svæðinu í tengslum við starf Norðanáttar. Í dag verður skrifað undir samkomulag við Háskólann á Akureyri og Háskólann á Hólum um að háskólarnir verði virkir samstarfsaðilar í þeirri nýsköpunarhringrás sem nú er að hefjast og lýkur með stórri fjárfestahátíð á Siglufirði á næsta ári.

Nóg að hafa hugmynd

Hún hvetur sem flesta sem ganga með hugmynd að nýsköpun í maganum að gefa hugmyndakeppnum á borð við þá sem lýkur í dag góðan gaum. Slíkar keppnir eru opnar öllum.

„Þau þurfa nefnilega ekki að vera nýsköpunarfyrirtæki. Þetta má bara vera fólk sem hefur hugmynd og langaði að henda henni á blað og svo að standa fyrir hana og tala um hana. Það þarf ekki meir.“