Viðskipti innlent

Munu fram­vegis dreifa bréfum tvisvar í viku

Atli Ísleifsson skrifar
Pósturinn segir að bréfasendingar hafi dregist saman um tæp 80 prósent frá árinu 2010.
Pósturinn segir að bréfasendingar hafi dregist saman um tæp 80 prósent frá árinu 2010. Pósturinn

Pósturinn mun dreifa bréfum tvisvar í viku um land allt frá og með 1. maí næstkomandi. Síðustu misseri hefur bréfum verið dreift annan hvern dag en Pósturinn er með þessu að bregðast við „verulegri fækkun bréfasendinga“.

Frá þessu segir í tilkynningu frá Póstinum. Þar er haft eftir Herði Jónssyni, framkvæmdastjóra rekstrarsviðs hjá Póstinum, að bréfum hafi fækkað gríðarlega á síðustu árum og hafi bréfasendingar dregist saman um tæp 80 prósent frá árinu 2010.

Hörður Jónsson, framkvæmdastjóri rekstrarsviðs hjá Póstinum.Pósturinn

„Þetta er mikil breyting sem gerir það að verkum að við þurfum að breyta þjónustunni í samræmi við nýjan raunveruleika. Á blómaskeiði bréfanna fór Pósturinn með mörg bréf í hverja lúgu, nú er farið kannski í þriðju til fjórðu hverja lúgu með að meðaltali eitt bréf. Á sama tíma fjölgar íbúðum ört víðs vegar um landið sem eykur yfirferð sem þarf að fara yfir,“ er haft eftir Herði.

Leiðir til sparnaðar

Hörður segir að enginn þurfi þó að örvænta enda muni Pósturinn sjá til þess að allir haldi áfram að fá bréfin sín reglulega. „Ef dreifing fellur á frídag eða hætta þarf við hana vegna veðurs eða af öðrum ástæðum munum við gæta þess að farið sé af stað við fyrsta tækifæri," segir Hörður. Hann segir að breyting á tíðni dreifingar muni leiða til sparnaðar og koma að hluta til móts við hækkandi kostnað við dreifingu á hverju bréfi.

Í tilkynningunni er einnig vísaði í að árið 2021 hafi Maskína framkvæmt könnun þar sem þátttakendur hafi meðal annars verið spurðir um póstdreifingu. „Niðurstöðurnar sýndu að um 82,9% þátttakenda telja dreifingu tvisvar í viku henta sér vel. Auk þess kom í ljós að þátttakendur álitu nauðsynlegt að fá bréfapóst 1,28 sinnum í viku að meðaltali,“ segir um könnunina.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.