Viðskipti erlent

Elon Musk og stjórn Twitter nálgist sam­komu­lag um sölu á sam­fé­lags­miðlinum

Eiður Þór Árnason skrifar
Elon Musk vill eignast Twitter.
Elon Musk vill eignast Twitter. Getty/Rafael Henrique

Twitter og Elon Musk nálgast nú samkomulag um að selja samfélagsmiðilinn til auðkýfingsins. Þetta hefur The New York Times eftir tveimur ónefndum heimildarmönnum sem eru sagðir þekkja stöðu mála.

Samningaviðræður milli stjórnar Twitter og Musks stóðu yfir fram á mánudagsmorgun en hann gerði nýverið óumbeðið tilboð í allt hlutafé fyrirtækisins. Fyrir helgi var síðan greint frá því að hann væri byrjaður að fjármagna 46,5 milljarða bandaríkjadala kaupin.

Báðir aðilar hafa rætt ýmis útfærsluatriði, þar á meðal tímalínu til að loka mögulegum samningi og þau gjöld sem yrðu greidd ef annar aðili myndi ganga frá kaupunum eftir að samningur væri undirritaður, að sögn New York Times.

Tóku tilboðinu ekki mjög alvarlega í fyrstu

Viðræðurnar héldu áfram eftir stjórnarfund Twitter á laugardagsmorgun þar sem tilboð Musks var rætt. Heimildarmenn blaðsins segja að stjórnin horfi öðruvísi á tilboðið eftir að Musk byrjaði að fjármagna kaupin. Það hafi leitt til þess að ellefu stjórnarmeðlimir Twitter gátu loks alvarlega íhugað tilboð Musks upp á 54,20 bandaríkjadali á hlut.

Enn eigi eftir að klára að útfæra samkomulagið en það sem í upphafi virtist vera mjög ólíkleg viðskipti virðist nálgast lendingarstað. Þó geti viðræðurnar enn siglt í strand.

Þann 14. apríl síðastliðinn lýsti Musk yfir þeim vilja sínum að kaupa Twitter í heilu lagi og taka fyrirtækið af hlutabréfamarkaði. Musk sem hefur yfir 83 milljónir fylgjenda á miðlinum byrjaði að kaupa hluti í Twitter fyrr á þessu ári og varð einn stærsti einstaki eigandi fyrirtækisins.

Sérfræðingar á Wall Street voru fljótir að hafna tilboði auðkýfingsins þar sem óljóst var hvort hann væri með nægt lausafé til að borga fyrir kaupin. Það breyttist eftir að hann gekk til samninga við fjármálastofnanir.


Tengdar fréttir

Musk getur ákveðið að gleypa eitruðu pilluna

Fólk skiptist í fylkingar eftir afstöðu þess til áforma ríkasta manns heims um að kaupa Twitter. Stjórn fyrirtækisins reynir nú allt til að stöðva auðkýfinginn, Elon Musk.

Nota gamalt bragð til að grípa til varna gegn yfirtöku Musks

Forsvarsmenn Twitter hafa gripið til varna til að koma í veg fyrir mögulega yfirtöku auðjöfursins Elons Musk á samfélagsmiðlafyrirtækinu. Með það markmið hefur stjórn Twitter notast við gamalt bragð á hlutabréfamarkaðinum sem myndi gera hluti Musks, og annarra, lítils virði.

Elon Musk vill taka yfir Twitter

Milljarðarmæringurinn Elon Musk hefur boðist til þess að kaupa Twitter á 41 milljarð bandaríkjadala. Hann segir nauðsynlegt að taka fyrirtækið af hlutabréfamarkaði til að ná fram raunverulegum breytingum og viðunandi árangri á samfélagsmiðlinum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.