Heimsmarkmiðin

Intellecon og BBA//Fjeldco styrkt til að kanna nýtingu jarð­varma til að þurrka te í Kenía

Heimsljós
Telauf tínd í Kenía 
Telauf tínd í Kenía  Marcel Crozet / ILO

Ráðgjafafyrirtækið Intellecon ehf. og lögfræðistofan BBA//Fjeldco hyggjast, með stuðningi Heimsmarkmiðasjóðs atvinnulífs um þróunarsamvinnu, kanna möguleikann á fjölnýtingu jarðvarma við þurrkun á te í Kenía í samstarfi við þarlenda aðila, Geothermal Development Company og Rosekey Foods.

María Mjöll Jónsdóttir, skrifstofustjóri alþjóða- og þróunarsamvinnuskrifstofu utanríkisráðuneytisins og Gunnar Haraldsson, framkvæmdastjóri Intellecon undirrituðu samning þess efnis í síðustu viku.

Terækt er mikilvæg atvinnugrein í Kenía en hún felur í sér töluverð umhverfisáhrif. Með fjölnýtingu jarðvarma má draga úr neikvæðum umhverfisáhrifum atvinnugreinarinnar. Verkefnið styður við heimsmarkmið Sameinuðu þjóðanna og þá sérstaklega við markmið átta um góða atvinnu og hagvöxt, markmið tólf um ábyrga neyslu og framleiðslu og markmið þrettán um aðgerðir í loftlagsmálum. 

Verkefnið getur stuðlað að markverðum árangri við að hefta útblástur koltvísýrings (CO2) frá Kenía. Árið 2002 var áætlað að í Kenía hafi verið brennd 155 þúsund tonn af timbri til að þurrka te og önnur matvæli. Um 1,8 tonn af koltvísýringi sleppur út í andrúmsloftið fyrir hvert tonn af timbri sem er brennt. Því má áætla að árið 2002 hafi um 300 þúsund tonnum af koltvísýringi verið sleppt út í andrúmsloftið vegna þurrkunar matvæla í Kenía. Til að setja þennan útblástur í samhengi þá hafa Íslendingar frá árinu 1912 til 2019 sparað um 400 þúsund tonn af koltvísýringi með því að nýta jarðvarma frekar en kol.

María Mjöll Jónsdóttir, skrifstofustjóri alþjóða- og þróunarsamvinnuskrifstofu utanríkisráðuneytisins og Gunnar Haraldsson, framkvæmdastjóri Intellecon.

Verkefnið er samstarfsverkefni ráðgjafafyrirtækisins Intellecon og lögfræðistofunnar BBA//Fjeldco sem hafa mikla og vaxandi reynslu af verkefnum tengdum jarðhita og öðrum endurnýjanlegum orkugjöfum í þróunarlöndum. Ef vel tekst til í samstarfi landanna á sviði orkugeira og matvælaframleiðslu standa vonir til þess að fleiri tækifæri til atvinnu- og verðmætasköpunar verði til þar í landi.

Heimsmarkmiðasjóður atvinnulífs um þróunarsamvinnu styður við fyrirtæki sem vilja vinna að heimsmarkmiðum Sameinuðu þjóðanna um sjálfbæra þróun með því að ráðast í samstarfsverkefni í þróunarlöndum. Með því að styðja við eflingu atvinnu- og viðskiptalífs í þessum löndum gefst einnig möguleiki til aukinna viðskipta á nýjum mörkuðum. Næsti umsóknarfrestur í sjóðinn er 3. maí. Nánari upplýsingar er að finna á utn.is/atvinnulifogthroun.


Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×