Viðskipti innlent

Skipta ORF Líftækni upp í tvö félög

Atli Ísleifsson skrifar
Liv Bergþórsdóttir tók við forstjórastöðunni hjá ORF Líftækni árið 2020.
Liv Bergþórsdóttir tók við forstjórastöðunni hjá ORF Líftækni árið 2020. ORF

ORF Líftækni hefur verið skipt upp í tvö aðskilin fyrirtæki; ORF Líftækni og svo BIOEFFECT Holding ehf. Þetta var samþykkt einróma af hluthöfum á aðalfundi félagsins sem fram fór fyrir helgi. Liv Bergþórsdóttir forstjóri mun starfa áfram sem forstjóri beggja félaga en verður síðan forstjóri BIOEFFECT.

Frá þessu segir í tilkynningu þar sem fram kemur að undanfarið ár hafi verið unnið að nýrri stefnu og framtíðarsýn fyrir ORF Líftækni. „Hin nýja stefna byggir á þeirri sýn að ORF Líftækni sé í raun tvær ólíkar rekstrareiningar sem eftir að hafa notið samlegðar í gegnum árin standi nú frammi fyrir betri tækifærum með aðskildum rekstri: BIOEFFECT með sjálfstæðri starfsemi fyrir húðvörur og ORF Líftækni sem sjálfstæð starfsemi fyrir vaxtaþætti.“

Því hafi verið unnið að uppskiptingu ORF Líftækni í tvö aðskilin fyrirtæki en við skiptinguna munu eignir félagsins skiptast á milli ORF Líftækni hf. og BIOEFFECT Holding ehf.

„Miðar skiptingin við 1. janúar 2022 og var hún samþykkt einróma af hluthöfum á aðalfundi félagsins 8. apríl 2022 en yfir 90% hluthafa sóttu fundinn.

Á aðalfundinum var ennfremur samþykkt tillaga stjórnar um útgáfu breytanlegra skuldabréfa fyrir allt að 500 milljónir króna i ORF Líftækni. Þá er frekari fjármögnun í undirbúningi fyrir ORF Líftækni sem áætlað er að geti numið allt að 25 milljónum Evra eða um 3,5 milljörðum króna og ætlunin er að sækja þá fjármögnun til nýrra erlendra og sérhæfðra fagfjárfesta.

Liv Bergþórsdóttir sem hefur verið forstjóri félagsins í 2 ár mun áfram starfa sem forstjóri beggja félaganna en síðan verða forstjóri BIOEFFECT í framhaldi af ráðningu stjórnar á nýjum forstjóra til að leiða ORF Líftækni,“ segir í tilkynningunni.

23 milljóna hagnaður

Ennfremur segir að heildarvelta ORF Líftækni árið 2021 hafi numið 2.179 milljónum króna og hafi hækkað um 20 prósent frá árinu áður. Hagnaður ársins nam 23,5 milljónum króna í samanburði við 146 milljóna króna tap árið 2020.

Sjálfkjörið var í stjórn Orf Líftækni hf. en hana skipa; Guðbjörg Edda Eggertsdóttir, Guðbjarni Eggertsson, Sigríður Elín Sigfúsdóttir, Knútur Dúi Kristján Zimsen og Sigtryggur Hilmarsson sem er jafnframt stjórnarformaður. Sama stjórn situr í báðum félögum, ORF Líftækni og BIOEFFECT Holding. 

Stjórn lagði til að ekki yrði greiddur út arður á árinu 2022 vegna ársins 2021.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.