Innlent

Tíu ára draumur varð að veruleika

Lillý Valgerður Pétursdóttir skrifar
Íbúarnir sex eru allir vinir og hafa sumir hverjir verið það síðan í leikskóla. Hvert og eitt þeirra hefur nú sína íbúð en þær tengjst allar og því auðvelt fyrir þau að heimsækja hvort annað.
Íbúarnir sex eru allir vinir og hafa sumir hverjir verið það síðan í leikskóla. Hvert og eitt þeirra hefur nú sína íbúð en þær tengjst allar og því auðvelt fyrir þau að heimsækja hvort annað. Vísir/Egill

Íbúar í Stuðlaskarði nýs íbúðakjarna fyrir fatlaða í Hafnarfirði fögnuðu því í gær að hafa eignast nýtt heimili. Um mikil tímamót er að ræða fyrir hópinn. Allir sex íbúarnir eru vinir og voru að flytja úr foreldrahúsum. Íbúarnir eru á aldrinum 28 til 32 ára og eru allir með Downs-heilkenni.

Um er að ræða sex nýjar tveggja herbergja íbúðir. Íbúðakjarninn er einstakur að því leyti að hann verður í eigu íbúanna sjálfra sem er ólíkt því sem áður hefur sést hér á landi.

Hugmyndin að þessu búsetuúrræði vinanna á sér tíu ára sögu og má í raun rekja til samtals á milli foreldra íbúa í hópnum þegar þeir hittust í Fjarðarkaupum. Á þeim tímapunkti voru vinirnir allir um tvítugt og foreldrar þeirra farnir að huga að framtíðarhúsnæði fyrir þá.

Biðlistar eftir búsetuúrræði sem þessu eru jafnan langir og erfitt að tryggja að vinir geti búið saman. Því ákváðu foreldrarnir að fara þá leið að stofna sérstakt félag sem stóð að gerð íbúðakjarnans.

Daníel Þorbjörnsson einn íbúanna skemmti sér vel í innflutningspartýinu sem haldið var í gær. Hann hefur nú komið sér vel fyrir í íbúðinni sinni og segir að sér líði vel þar. 

„Þau sex sem búa í íbúðunum eru miklir vinir og hafa sum hver verið síðan á leikskóla. Þau hafa því mikinn stuðning hvert frá öðru. Þá eru fjögur þeirra úr Hafnarfirði,“ segir Margrét Vala Marteinsdóttir forstöðukona Stuðlaskarðs.

Völdu starfsfólkið sjálf

Mikil áhersla er lögð á sjálfsákvörðunar rétt allra íbúanna og koma þeir til með að sitja í stjórn félagsins. Þá komu íbúarnir að ráðningu starfsfólksins en starfsmannahópurinn er nokkuð stór eða tuttugu manns.

Það var byggingarsjóður Þroskahjálpar sem byggði húsið en íbúarnir leigja það. Íbúðakjarninn er rekinn með stuðningi frá Hafnarfjarðarbæ en rekstrarsamningur er við bæinn.

Margir sem komið hafa að verkefninu lögðu leið sína í innflutningspartýið í gær en dagurinn var sérstaklega stór fyrir vinina sex og foreldra þeirra. 

„Virkilega gleðilegt að sjá tíu ára draum bara verða að veruleika. Geta sleppt hendinni af stráknum í öruggt og bara spennandi umhverfi,“ segir Indriði Björnsson faðir eins íbúans og stjórnarformaður Vinabæjar sem á og rekur Stuðlaskarð.

Um er að ræða nýtt hús í Hafnarfirði en hver og einn íbúi á sína íbúð og er með aðgang að litlum garði.Vísir/Egill

Indriði segir miklu máli skipta að íbúarnir sjálfir hafi mikið að segja um starfsemina. 

„Félagið sjálft kemur til með að verða í eigu íbúanna sjálfra. Þannig að þeir koma til með að ráða og hafa áhrif á þjónustuna og hvað verður gert og áherslur og svo framvegis.“

Íbúarnir fluttu inn fyrir skömmu og hefur hver og einn þeirra innréttað sína íbúð á sinn hátt.

„Þetta hefur bara farið alveg ofboðslega vel af stað. Við erum með öflugt starfsfólk. Frábæra íbúa og höfum verið að vinna þetta í samvinnu með hérna sjálfsákvörðunarrétt að leiðarljósi og sjálfstæði. Þannig að hér erum við bara mjög ánægð með alla þessa sögu í rauninni og hvernig þetta gengur,“ segir Margrét Vala.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×