Vilja nú fjörutíu milljónum meira fyrir hús sem var keypt í júlí

Hallgerður Kolbrún E. Jónsdóttir skrifar 16. mars 2022 12:58

Eignin er í slæmu ásigkomulagi en hefur þó hækkað um rúmar tuttugu milljónir króna í verði frá því hún var sett á sölu í október. Vísir/Vilhelm

Hús á Lindarbraut á Seltjarnarnesi, sem hefur verið á sölu í fimm mánuði, hefur hækkað um rúmar tuttugu milljónir króna í verði frá því það var sett á sölu. Húsið er 183,4 fermetrar og er til sölu fyrir 192 milljónir króna.

Húsið var fyrst sett á sölu í október og var uppsett verð 170 milljónir. Húsið var byggt árið 1973 og eru þar fimm svefnherbergi, þvottahús og bílskúr, þar sem gert er ráð fyrir tveimur stúdíóíbúðum.

Um er að ræða einbýlishús á einni hæð. Fermetraverð hússins var um 927 þúsund krónur á hvern fermetra í október en er nú komið upp í tæpar 1,05 milljónir króna. Skráningu hússins á fasteignavef Vísis fylgja ekki myndir innan úr húsinu, en nokkrar utan af því.

Eins og sjá má á myndinni þarfnast eignin töluverðs viðhalds.Vísir/Vilhelm

Vísir fjallaði um söluna í október og sagði þá í auglýsingunni að öll eignin þarfnaðist endurbóta, garðurinn væri í órækt og áhugasamir hvattir til ítarlegrar skoðunar á eigininni. Í nýrri auglýsingu segir að kominn sé tími á ýmist viðhald á eigninni.

Netverjar hafa einhverjir furðað sig á hækkuninni, enda einsdæmi að hús sem ekki selst og er í slæmu ásigkomulagi hækki svo mikið í verði á svo stuttum tíma.

Þetta er svo furðulegt. Það þarf greinilega að taka þetta hús allt í gegn. Ég væri svo til í að vita hvað gengur á þarna. Húsið selst ekki. Best að hækka verðið. Repeat.
— Theodór Ingi (@TeddiLeBig) March 15, 2022

Athygli er vakin á því í umræðu á Twitter að eigandi hússins keypti það í júlí í fyrra. Þá var kaupverðið 156 milljónir króna. Verðið hefur því hækkað um 36 milljónir frá því í júlí 2021.

„Ég tek eftir því að þetta hús kemur aftur og aftur inn og er alltaf að hækka í verði,“ segir Theódór Ingi Ólafsson áhugamaður um fasteignir í samtali við Vísi.

Hann segist ekki hafa tekið eftir því að aðrar eignir hafi hækkað svo í verði þrátt fyrir að hafa ekki selst.

„Yfirleitt þegar íbúðir og hús hafa verið lengi á sölu finnst mér þær yfirleitt lækka í verði eftir því sem tíminn líður,“ segir Theódór.

„Sérstaklega hús í slæmu ásigkomulagi.“

Hér má sjá auglýsinguna sem var tekin út eftir að fréttastofa hafði samband við fasteignasalann.Vísir/skjáskot

Fréttastofa leitaði svara um hækkandi verð eignarinnar hjá fasteignasalanum, sem tók eignina út af fasteignavefnum samstundis.

Fasteignamarkaður Seltjarnarnes

Tengdar fréttir

Vísitala íbúðaverðs hækkað um 22,5 prósent síðastliðið ár

Vísitala íbúðaverðs á höfuðborgarsvæðinu var 844,0 stig í febrúar og hækkar um 2,5% á milli mánaða. Þetta er meiri hækkun en í janúar og desember þegar vísitalan hækkaði um 1,7% og 1,8% frá fyrri mánuði.

15. mars 2022 18:20

Sigvaldahús í Skerjafirði á markaði í tæpt ár hefur lækkað um sextíu milljónir

Einbýlishús við Skildinganes í Skerjafirði, sem var teiknað af Sigvalda Thordarson arkítekt, hefur verið á sölu síðan í maí í fyrra og hefur ásett verð lækkað um 57 milljónir króna.

9. mars 2022 22:31

Kalla eftir róttækum breytingum til að hraða uppbyggingu íbúða

Ef ætlunin er að byggja meira en 3.500 íbúðir á ári til þess að svala árlegri íbúðaþörf þarf grundvallarbreytingu í meðferð skipulagsmála og mikla einföldun á regluverki. Skipulagsferlar, eins og þeir eru í dag, koma í veg fyrir að byggðar verði nægilega margar íbúðir á næstu árum.

9. mars 2022 17:27

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.