Pochettino á förum frá PSG?

Eftir að hafa verið með 2-0 forystu með mörkum frá Kylian Mbappe í leikjunum tveimur þá hrundi varnarleikur PSG á tæpum 20. mínútna kafla á Bernabéu þegar Karim Benzema skoraði þrjú mörk og Real fór því áfram í 8-liða úrslit eftir samanlagðan 3-2 sigur.

„Við gerðum nokkur mistök, við getum ekki forðast þá staðreynd. Það versta við þetta allt er að við vorum betra liðið í þessu einvígi en við töpuðum því á einungis 10 mínútum,“ sagði Pochettino eftir tapið í Madríd.

PSG hefur gefið út að meistaradeildin er þeirra heilagi kaleikur, bikarinn sem liðið ætlar sér að sækja. Þrátt fyrir að vera með þrettán stiga forskot á toppi frönsku deildarinnar þá eru forráðamenn PSG sagðir strax vera byrjaðir að leita af knattspyrnustjóra liðsins fyrir næsta tímabil. Að Pochettino fái brottrekstrarpassann eftir yfirstandandi tímabil.

„Markmið okkar er að vinna meistaradeildina og þegar það kom að hálfleik þá vorum við í góðum málum. Við ættum ekki að kasta öllu í ruslatunnuna strax. Við eigum ekki að þurfa að byrja aftur frá grunni eftir hvert tap. Pochettino er enn þá hluti af liðinu á þessu tímabili,“ sagði Leonardo, yfirmaður knattspyrnumála hjá PSG í samtali við franska fjölmiðilinn RMC.

Manchester United hefur lengi haft augastað á Pochettino en það fer að verða ansi líklegt að argentínski knattspyrnustjórinn muni stýra liðinu á næsta tímabili.