Leikur Wales og Austurríkis fer fram á tilsettum tíma þrátt fyrir frestun

Leik Úkraínu og Skotlands, sem átti einnig að fara fram þann 24. mars, var frestað eftir innrás Rússa í Úkraínu. Leikirnir tveir eru undanúrslitaleikir og sigurvegarar leikjanna mætast svo í hreinum úrslitaleik um laust sæti á HM.

„FAW (e. Football Association of Wales) styður ákvörðun FIFA um að frestun leiksins, stendur við bakið á Úkraínumönnum og ítrekar um leið að við fordæmum aflbeitingu og ódæðisverk Rússa,“ segir í tilkynningu frá velska knattspyrnusambandinu.

Það lið sem hefur betur í leik Wales og Austurríkis gæti þurft að bíða í nokkra mánuði áður en vitað er hverjir andstæðingar þeirra verða í úrslitaleiknum um sæti á HM. Liðið þarf þá einnig að bíða alla þessa mánuði áður en vitað er hvenær úrslitaleikurinn getur farið fram.

Viðræður standa nú yfir um nýja tímasetningu fyrir leik Skotlands og Úkraínu, en landsliðsglugginn í júni þegar keppt er í Þjóðardeildinni, þykir líklegur.