Lífið

„Mig langar að lifa og mig langar að verða gamall með konunni minni“

Elísabet Hanna skrifar
Sigurbjörn Árni Arngrímsson.
Sigurbjörn Árni Arngrímsson. Vísir/Vilhelm

Ástríðufulli íþróttalýsandinn Sigurbjörn Árni Arngrímsson greindist með ólæknandi sortuæxli og deilir sögu sinni í nýjasta Krafts hlaðvarpsþættinum af Fokk ég er með krabbamein. 

Hann er búinn að hugsa meira um jarðaförina en dauðann og ætlar sjálfur að flytja líkræðuna í jarðaförinni sinni og fá síðasta orðið.

Poppaði út á maganum

„Ég vakna á miðvikudegi og það er eitthvað búið að poppa út á maganum á mér, kviðnum á mér, þar er bara einhver útferð. Ég hélt fyrst að þetta væri kviðslit nema ég náttúrulega fann ekki fyrir neinu“

segir Sigurbjörn um það hvenær hann varð fyrst var við meinið. Í framhaldinu tóku við læknisheimsóknir og myndatökur og í kjölfarið var hann greindur með fjórða stigs sortuæxli sem var búið að dreifa sér. Hann fékk greininguna föstudeginum fyrir helgi þegar hann átti að fara að lýsa Reykjavíkurleikunum á sunnudeginum, í dag eru ellefu mánuðir síðan. 

„Þetta er náttúrulega bara í lang lang langflestum tilfellum bara dauðadómur,“

segir hann um greininguna. Nokkrum árum áður hafði hann fengið fæðingarblett sem honum fannst furðulegur, bletturinn var fjarlægður, sendur í ræktun þar sem breytingar komu í ljós og allir eitlar skoðaðir í framhaldinu og þar með átti þetta að vera búið. 

„Svo fimm árum seinna er þetta komið út um allt og enginn veit hvernig,“

bætir hann við.

Sigríður Þóra Ásgeirsdóttir settist niður með Sigurbirni í nýjasta þætti af hlaðvarpinu Fokk ég er með krabbamein. Hægt er að hlusta á viðtalið í heild sinni í spilaranum hér fyrir neðan. Hlaðvarpið er framleitt af Krafti í samstarfi við Vísi og birtast tveir þættir í mánuði. 

Klippa: Fokk ég er með krabbamein - Mig langar að lifa

Skrítið að skipuleggja framtíðina

„Til að eiga meiri tíma þarf ég að minnka við mig vinnuna,“

segir Sigurbjörn um það að vera áfram í fullu starfi. Hann segir að á sama tíma séu áhyggjur af fjárhag fjölskyldunnar ef hann fellur frá og tilfinningin að vilja tryggja góða afkomu þeirra í framtíðinni mjög sterk.

Sigurbjörn segir að það sé skrítið að hugsa til þess að hann og eiginkona hans hafi verið byrjuð að spá í því hvað þau ætluðu að gera í næsta fasa lífsins, hvernig þau ætluðu að njóta hans og eldast saman. Allt í einu sé hún mögulega að fara að vera ein í því, eða jafnvel með einhverjum öðrum en honum.

Sigurbjörn Árni Arngrímsson ræðir sína reynslu í einlægu viðtali um krabbameinið.Vísir/Vilhelm

Mun reyna að hrekkja fólkið sitt að handan

Hann trúir á eftirlífið og ætlar að reyna að hrekkja fólkið sitt að handan ef hann á möguleika á því. 

„Mér finnst það mjög líklegt að ég myndi reyna að hrekkja eitthvað ef ég mögulega gæti sko, það er bara eins og ég segi lífið er bara til þess að hafa gaman að því“

segir Sigurbjörn glettinn. Hann tekur krabbameininu af miklu æðruleysi og vill skapa fleiri minningar með börnunum á meðan tími gefst.

„Mig langar að lifa og mig langar að verða gamall með konunni minni.“
Hlaðvarpið Fokk ég er með krabbamein er unnið af Krafti í samstarfi við Vísi.Vísir/Vilhelm

Nánari upplýsingar um starfsemi Krafts má finna á vefnum þeirra kraftur.org.


Tengdar fréttir

Beit á jaxlinn allt of lengi og hrundi á endanum

„Konan mín greindist með þríneikvætt brjóstakrabbamein,“ segir Pétur Helgason um það hvernig hann kynntist þessum erfiða sjúkdómi. „Hennar æxli var mjög aggresíft í vexti.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.