Viðskipti innlent

Valitor skilaði loks hagnaði á ársgrundvelli

Eiður Þór Árnason skrifar
Höfuðstöðvar Valitor í Hafnarfirði.
Höfuðstöðvar Valitor í Hafnarfirði. Vísir/Vilhelm

Heildarafkoma Valitor nam um 353 milljónum króna á árinu 2021, samanborið við heildartap upp á um einn milljarð króna árið áður. Viðsnúningurinn á milli ára er því um 1,4 milljarðar króna.

Þetta er í fyrsta sinn sem Valitor skilar hagnaði á ársgrundvelli frá árinu 2017. Fram kemur í tilkynningu frá félaginu að heildartekjur félagsins hafi numið um 14,3 milljörðum króna á árinu og aukist um 2,5% á milli ára. Arion banki, eigandi Valitor, samdi um sölu á fyrirtækinu til fjártæknifélagsins Rapyd þann 1. júlí 2021. Salan bíður samþykkis frá Fjármálaeftirlitinu og Samkeppniseftirlitinu.

Samkvæmt tilkynningu dróst heildarrekstrarkostnaður félagsins saman um tæplega 1,2 milljarða á milli ára og launakostnaður um 350 milljónir króna á árinu. Annar rekstrarkostnaður ásamt afskriftum lækkaði um 850 milljónir króna.

Hagræðingaraðgerðir tekið á starfsfólk

„Það er ánægjulegt að sjá árangur af þeim hagræðingaraðgerðum sem við höfum þurft að ráðast í á liðnum árum og eru að skila sér í bættri afkomu Valitor. Þær aðgerðir hafa tekið á bæði stjórnendur og starfsmenn á sama tíma og félagið hefur tekist á við þau áhrif sem kórónuveiru-faraldurinn hefur haft á reksturinn,“ segir Herdís Dröfn Fjeldsted, forstjóri Valitor.

„Framundan eru áskoranir sem meðal annars fela í sér auknar varnir, uppfærslu á tæknibúnaði og frekari vöxt samhliða bættu vöruframboði. Með bættum rekstri erum við betur í stakk búin til að takast á við þær áskoranir og við horfum til ársins 2022 full tilhlökkunar með okkar öfluga starfsfólki.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.