Heimsmarkmiðin

GRÓ skólarnir störfuðu með nokkuð eðlilegum hætti þrátt fyrir heimsfaraldur

Heimsljós
Umræðufundur um GRÓ.
Umræðufundur um GRÓ.

Öllum skólunum fjórum sem starfa á vegum GRÓ Þekkingarmiðstöð þróunarsamvinnu tókst að halda starfi sínu áfram á síðasta ári með nokkuð eðlilegum hætti og taka á móti nemendum í sex mánaða þjálfunarnámið, þrátt fyrir ýmsar áskoranir tengdar COVID-19 heimsfaraldrinum.

 Mikil röskun varð á starfinu árið 2020 og þurftu þrír skólanna þá að fresta komu nemenda um eitt ár. Þeir komust hingað loks í fyrra en þá sóttu 90 sérfræðingar frá þróunarlöndunum þjálfun við skólana fjóra hér á landi. Að auki var aftur hægt að standa fyrir námskeiðum á vettvangi.

GRÓ Þekkingarmiðstöð þróunarsamvinnu stóð fyrir fræðslu- og umræðufundi um starfið síðastliðinn föstudag. Á fundinum var fjallað um stefnu Íslands í þróunarsamvinnu, samstarf með Þróunarsamvinnunefnd OECD (DAC), áherslur í starfi UNESCO og ýmislegt fleira.

Fjórir skólar eru starfræktir á vegum GRÓ á Íslandi. Er þar um að ræða Jafnréttisskólann sem er hýstur hjá Háskóla Íslands, Jarðhitaskólann sem er starfræktur hjá Íslenskum orkurannsóknum, Landgræðsluskólann sem starfar í Landbúnaðarháskólanum og Sjávarútvegsskólann, sem er rekinn af Hafrannsóknarstofnun. Skólarnir starfa á sviðum þar sem Íslendingar búa yfir sérþekkingu og vinna að því að byggja upp getu einstaklinga, samtaka og stofnana í þróunarlöndunum og þar sem átök hafa geisað. Skólarnir hafa starfað um áratugaskeið og verið einn af mikilvægustu þáttum í alþjóðlegri þróunarsamvinnu Íslands. Alls hafa skólarnir útskrifað um 1500 sérfræðinga og staðið fyrir fjölda viðburða og námskeiða í samstarfslöndum. Skólarnir voru árið 2020 færðir undir GRÓ Þekkingarmiðstöð þróunarsamvinnu, sem er sjálfstæð miðstöð á vegum utanríkisráðuneytisins sem starfar undir merkjum UNESCO, Mennta-, vísinda- og menningarmálastofnunar Sameinuðu þjóðanna.

Á fundinum voru samankomnir fulltrúar í stjórn GRÓ, starfsmenn skólanna fjögurra og þeirra hýsistofnana sem þeir starfa hjá, sem og starfsfólk utanríkisráðuneytisins. Þjónustusamningar GRÓ við hýsistofnanirnar fjórar gera ráð fyrir að GRÓ bjóði með reglubundnum hætti upp á kynningar um málefni sem tengjast GRÓ og starfi skólanna. Fundurinn var liður í að sinna því hlutverki GRÓ.

Á fundinum sagði Elín Flygenring sendiherra, sem stýrði framboði Íslands til framkvæmdastjórnar UNESCO 2021-2025, frá setu Íslands í stjórninni og áherslum í starfi UNESCO. Erla Hlín Hjálmarsdóttir, deildarstjóri árangurs og úttekta, fjallaði um stefnu Íslands í þróunarmálum og mikilvægi úttekta og árangursmælinga í þróunarstarfi og Sara Ögmundsdóttir deildarstjóri fjármála og tölfræði, fjallaði um starf Þróunarsamvinnunefndar OECD (DAC) sem Ísland á sæti í. Nína Björk Jónsdóttir, forstöðumaður GRÓ, stýrði fundinum þar sem fram fór lífleg umræða um starf GRÓ, starfið framundan og þann árangur sem starfið hefur skilað allt frá því fyrsti skólinn var stofnaður árið 1979.


Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.