Neytendur

Ísey Skyr Bar laut í lægra haldi í deilu um upp­skriftir og út­lit um­­búða og vara

Atli Ísleifsson skrifar
Ísbúð Garðabæjar hafnaði að réttir Ísey Skyr Bar væru einstakir á heimsvísu. Einföld leit á netinu leiði annað í ljós.
Ísbúð Garðabæjar hafnaði að réttir Ísey Skyr Bar væru einstakir á heimsvísu. Einföld leit á netinu leiði annað í ljós. Vísir/Vilhelm

Áfrýjunarnefnd neytendamála hefur staðfest ákvörðun Neytendastofu um að útlit umbúða og vara Ísey Skyr Bar skorti nægilegt sérkenni til þess að fyrirtækið gæti notið einkaréttar á því.

Ísey Skyr Bar hafði áður kvartað til Neytendastofu vegna markaðssetningar S.G. Veitinga, sem rekur Ísbúð Garðabæjar, á skálum og drykkjum. Fór Ísey fram á að Ísbúð Garðabæjar yrði meinað að nota þær uppskriftir sem væru „eins og uppskriftir [Ísey] eða [fælu] eingöngu í sér smávægileg frávik frá þeim.“

Í kvörtuninni kom fram að Ísey Skyr Bar hefði varið umtalsverðum fjármunum og vinnu til þróunar veitingastaða sem reknir væru undir vörumerkinu Ísey Skyr Bar bæði á útsölustöðum N1 á höfuðborgarsvæðinu og í verslunum Hagkaups í Skeifunni, Smáralind og Kringlunni á grundvelli ítarlega skilgreindrar hugmyndafræði og umgjarðar. 

Er þar boðið upp á skálar, boozt drykkir, safar og skot og vildi Ísey meina að þeir booztdrykkir sem Ísbúð Garðabæjar byði upp á væru ýmist bein eftirlíking af réttum Íseyjar eða að veruleg líkindi væru fyrir hendi. „Ætlunin væri augljóslega að skapa sömu hughrif hjá neytendum og nýta þá fjármuni og vinnu sem kærandi hefði varið í þróun á fyrrgreindri hugmyndafræði og umgjörð.“

Vildi Ísey til dæmis meina að booztið „1001 nótt“ hjá Ísey og „Boozt ársins“ Ísbúð Garðabæjar væru nánast eins. Hið sama gilti um „Græna booztið“ hjá Ísey og „Grænn ofurboozt“ hjá Ísbúð Garðabæjar, „Boozt jarðaberja“ hjá Ísey og „Jarðaberjabooztið“ hjá Ísbúð Garðabæjar og að lokum „Fersku mangóboozti“ hjá Ísey og „Sumar booztinu“ hjá Ísbúð Garðabæjar.

Einföld leit á netinu neiðir annað í ljós

Ísbúð Garðabæjar hafnaði hins vegar í sínu bréfi að réttir Ísey Skyr Bar væru einstakir á heimsvísu. Einföld leit á netinu leiði annað í ljós. Var því hafnað að brotið hafi verið gegn góðum viðskiptaháttum eða að líkt hafi verið eftir vörum eða markaðssetningu Ísey Skyr Bars. 

„Engin uppskrifta Ísey Skyr Bars sé þannig að einn aðili geti átt lögvarinn einkarétt til þeirra heldur sé þetta mismunandi samsetning vinsælla hráefna. Umbúðirnar séu glær plastílát sem séu fjöldaframleidd og flestir seljendur slíkra vara hér á landi noti. Þá séu vörur S.G. Veitinga skilmerkilega merktar Ísbúð Garðabæjar sem ætti að koma í veg fyrir rugling.“

Skortir nægilegt nýnæmi og sérkenni

Á vef Neytendastofu segir að í úrskurði áfrýjunarnefndar sé meðal annars fjallað um að matarrétti Ísey Skyr Bar skorti nægilegt nýnæmi og sérkenni til að njóta réttarverndar sem sjálfstætt hugverk.

„Réttir S.G. Veitinga, sem svipi mjög til rétta Ísey Skyr Bars, feli ekki í sér ótilhlýðilegar eftirlíkingar sem brjóti í bága við góða viðskiptahætti. Þá verði því ekki slegið föstu að S.G. Veitingar hafi notfært sér myndir Ísey Skyr Bars við markaðssetningu sína.

Við mat á því hvort hætta væri á að neytendur rugluðust á vörum fyrirtækjanna leit áfrýjunarnefndin m.a. til þess að útsölustaðir fyrirtækjanna bæru verulega ólík nöfn og að auðkenni þeirra væru ólík. Þó báðir kalli matarrétti sína líkum nöfnum verði þau að teljast almenn og lýsandi fyrir viðkomandi vörur,“ segir á vef Neytendastofu.

Lesa má úrskurð áfrýjunarnefndarinnar hér. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.