Heimsmarkmiðin

Nýtt almenningsrými í Gaza hannað fyrir konur og stúlkur

Heimsljós
UN Women

Um 50 prósent íbúa á Gaza telja sig ekki örugg í almenningsrýmum og forðast að nota þau.

Haya Promenade er heiti á nýju almenningsrými í Gaza sem hannað er með þarfir kvenna og stúlkna að leiðarljósi. Verkefnið var styrkt af UN Women og er liður í því að gera borgarrými að öruggu svæði fyrir konur og stúlkur.

UN Women segir í frétt að í upphafi verksins hafi verið gerðar úttektir á um 134 almenningsrýmum í Gaza um ástæður þess að konur og stúlkur noti ekki slík svæði kannaðar. Niðurstöður leiddu í ljós að um 50 prósent íbúa á Gaza telja sig ekki örugg í almenningsrýmum og forðast að nota þau.

„Þegar vinna við hönnun Haya Promenade svæðisins hófst var leitað til ólíkra hópa eftir ráðgjöf, meðal annars kvenna og ungmenna. Þetta var gert því svæðið átti að uppfylla þarfir allra, en einnig hvetja konur og stúlkur til að láta sig borgarmál varða og raddir sínar hljóma,“ segir í fréttinni.

Skorti sárlega örugg rými

Einn ráðgjafanna er 17 ára gömul stúlka sem sagði einstakt að koma á svæði sem hún hafði aðstoðað við að hanna.

„Þetta hefur vakið áhuga minn á borgarhönnun og hvernig megi fá almenning til að taka aukinn þátt í mótun opinberra rýma. Ég er stolt að hafa lagt mitt af mörkum til að gera borgina okkar að öruggara rými fyrir konur og stúlkur,“ sagði hún.

Haya Promenade er í einu fátækasta svæðinu á Gaza. Þar skorti að mati UN Women sárlega vel hannað borgarrými þar sem konur og stúlkur gátu notið samvista með fjölskyldum sínum án þess að upplifa sig óöruggar. Við hönnun svæðisins var séð til þess að aðgengi væri gott, að skiptiaðstaða væri til staðar, auk þjónustumiðstöðvar.

Eitt af verkefnum UN Women síðustu ár hefur verið að skapa öruggar borgir fyrir konur og stúlkur og er Haya Promenade hluti af því verkefni. Konur eru ólíklegri til að taka fullan þátt í samfélaginu upplifi þær sig óöruggar í almenningsrýmum. Þær eru líklegri til að takmarka ferðir utandyra, forðast almenningssamgöngur, fara síður út eftir myrkur og því líklegri til að einangrast. UN Women er ein af áherslustofnununum Íslands í alþjóðlegri þróunarsamvinnu.

Hægt er að styðja verkefni sem þetta með því að gerast ljósberi UN Women á Íslandi.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.