Bruce Springsteen selur réttinn fyrir 65 milljarða

Atli Ísleifsson skrifar 16. desember 2021 13:41

„Stjórinn“ á tónleikum í september síðastliðinn til að minnast fórnarlamba árásanna á Tvíburaturnana í New York árið 2001. EPA

Bandaríski tónlistarmaðurinn Bruce Springsteen hefur selt upptökur og útgáfurréttinn að öllu lagasafni sínu til Sony fyrir 500 milljónir Bandaríkjadala, um 65 milljarða króna.

Með samningnum eignast Sony réttinn að öllum tuttugu plötum tónlistarmannsins og þar með öllum þeim ódauðlegu lögum sem Springsteen hefur hljóðritað á ferli sínum.

Springsteen hefur tuttugu sinnum unnið til Grammy-verðlauna og segir í frétt BBC að tónlist hans hafi skilað 15 milljóna dala tekjum bara á síðasta ári.

Springsteen fylgir þar með í fótspor fjölda annarra tónlistarmanna sem hafa selt réttinn að verkum sínum á síðustu misserum, líkt og Bob Dylan, Blondie og Paul Simon. Þá var rétturinn að lögum David Bowie seldur fyrr á árinu.

Springsteen er höfundur og flytjanda laga á borð við Born to Run, Dancing in the Dark, Born in the USA, The River, Atlantic City, Brilliant Disguise og Secret Garden.

Í frétt BBC segir að enn hafi ekki verið greint opinberlega frá samningnum, en samkvæmt heimildum ku samningurinn vera sá stærsti sinnar tegundar til þessa.

Springsteen er einn vinsælasti rokktónlistarmaður allra tíma og hefur stærstan hluta ferilsins verið á samningi hjá Columbia Records sem er í eigu Sony.

Bandaríkin Sony Tónlist

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.