Neytendur

Verðið hjá Póstinum hækkar á landsbyggðinni

Kolbeinn Tumi Daðason skrifar
Þórhildur Ólöf Helgadóttir, forstjóri Íslandspósts.
Þórhildur Ólöf Helgadóttir, forstjóri Íslandspósts. Pósturinn

Verð á sendingum Íslandspósts á fjölpósti og sendingum á pökkum 0-10 kg að þyngd tekur breytingum um mánaðamótin. Þetta kemur fram í tilkynningu frá Póstinum.

Þar segir að ástæða verðbreytinga sé ný lög sem kveði á um að gjald fyrir sendingar endurspegli raunkostnað en verði ekki jafnað út þvert yfir landið með stuðningi frá ríkinu eins og fyrri lög hafi kveðið um.

Gildistaka nýrra laga verður til þess að fyrirtækið aðlagar gjaldskrá sína sem sumstaðar verður til þess að verð hækka en annarsstaðar munu þau lækka. Einnig tekur gildi ný verðskrá fyrir fjölpóst sem tekur mið af breyttum kostnaði við slíkar sendingar.

Eldri lög – Eitt verð fyrir landið allt

Fyrri lög kváðu á um að sama gjaldskrá væri fyrir póstsendingar, óháð hvar á landinu sendandi eða móttakandi væri staddur. Markmið þeirra laga var að kostnaður við sendingar á pósti væri sá sami um allt land. 

Útfærsla þessa markmiðs fól í sér að ríkissjóður niðurgreiddi hluta sendingarkostnaðar fyrir viðskiptavini á strjálbýlli svæðum til móts við sendanda.

Nýju lögin - Sendingagjald endurspegli kostnað

Lagabreytingar frá því í sumar kveða á um að gjald fyrir sendingar á 0-10 kg pökkum endurspegli kostnað við flutning og mun ríkið einnig hætta að niðurgreiða kostnað við sendingar.

Að neðan má sjá verðskrána hjá Póstinum. eins og sjá má nemur munurinn á sendingum á þyngstu pökkunum allt að fimmtíu prósentum eftir landshlutum. Verð hækkar víðast hvar en allra mest á landsbyggðinni. Verðskrána má sjá skýrar hér.

Hér má sjá verðskrána eftir póstnúmerum.pósturinn

Gildistaka nýrra laga þýðir að Pósturinn þarf að aðlaga gjaldskrá sína á pökkum innanlands 0-10kg sem sumstaðar verður til þess að verð hækka en annarsstaðar munu þau lækka.

Verðbreytingar á fjölpósti

Einnig tekur gildi ný verðskrá fyrir fjölpóst sem tekur mið af breyttum raunkostnaði við slíkar sendingar. 

Fjölpóstur hefur í gegnum tíðina fengið að fljóta með öðrum bréfasendingum sem varð til þess að viðbótarkostnaður við þessa dreifingu var óverulegur þar sem bréfin báru mestan hluta kostnaðar. 

Vegna fækkunar á bréfum hefur Pósturinn nú viðkomu á mun færri stöðum vegna, fjölpóstur kallar hins vegar á viðkomu á hverjum stað og hefur raunkostnaður við dreifingu hans því aukist. 

Ný verðskrá fyrir fjölpóst tekur mið af þessum breytingum.

Engin breyting á bréfum undir 51 grammi

Póstinum er áfram heimilt að viðhafa sömu verðskrá um allt land á bréfum undir 51 grammi.

Engin ákvörðun hefur verið tekin um breytingu á verðskrá að svo stöddu og mun Pósturinn því eftir sem áður sinna póstsendingum til allra landsmanna fyrir hönd ríkisins, segir í tilkynningu frá Póstinum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×