Fær ekki vaskinn endur­greiddan vegna vinnu við upp­hækkun jeppa

Kærandi reyndi að fá virðisaukaskattinn af vinnu fyrir breytingar á jeppanum endurgreiddan í nafni breytinga á virðisaukaskattslögum vegna faraldurs kórónuveirunnar sem fól í sér tímabundna endurgreiðslu virðisaukaskatts af vinnu manna á árinu 2021. Náðu breytingarnar meðal annars í sér til vinnu vegna bílaviðgerðar, bílamálningar eða bílaréttingar fólksbifreiða.

Áður hafði embætti ríkisskattstjóra hafnað beiðninni og kærði maðurinn ákvörðunina til yfirskattanefndar og til að fá henni hnekkt.

Sölureikningurinn var gefinn út í mars 2021 og nam alls 2.107.000 krónur, en þar af nam vinnuliðurinn 1.001.000 krónur. „Miðað við lýsingu á sölureikningnum var um að ræða vinnu „við 35“ breytingu, brettakanta, úrklippu, loftdælu og dráttarbeisli o.fl.“, eins og þar segir.

Í beinu framhaldi af kaupum á nýjum jeppa

Í umsögn ríkisskattstjóra í málinu er dregin sú ályktun að um hafi verið að ræða breytingar á jeppanum í beinu framhaldi af kaupum kæranda á honum nýjum, en kærandi hafi keypt bílinn í febrúar 2021 eða sama dag og hún var nýskráð miðað við upplýsingar í ökutækjaskrá.

Ekki komu fram neinar athugasemdir af því tilefni af hálfu mannsins og tekur nefndin því undir það með ríkisskattstjóra að hafna beri beiðninni um endurgreiðslu. Sömuleiðis hafi orð nefndarálits efnahags- og viðskiptanefndar Alþingis með frumvarpi til laganna mælt þessari túlkun mannsins.

Nefndin telur því ekki vera forsendur til að skýra heimildina svo rúmt að hún taki til vinnu við slíkar breytingar á fólksbílum sem um ræðir í tilviki kæranda sem telja verður að miði fyrst og fremst að því að breyta notkunareiginleikum viðkomandi bíls með upphækkun hennar og stærri dekkjum. 

Kröfum hans hafi því verið hafnað.