Viðskipti erlent

Gates harmar samskiptin við Epstein

Hólmfríður Gísladóttir skrifar
Gates segir þá Epstein hafa snætt saman nokkur skipti.
Gates segir þá Epstein hafa snætt saman nokkur skipti.

Bill Gates, stofnandi Microsoft og einn ríkasti maður heims, harmar að hafa átt samskipti við fjársýslumanninum Jeffrey Epstein. Sagðist hann einungis hafa gert það í von um að Epstein notaði tengsl sín til að afla fjármuna til mannúðarmála.

„Það voru stór mistök að verja tíma með honum, að ljá honum trúverðugleika með því að vera á staðnum,“ sagði Gates í viðtali við CNN í gær. Sagðist hann snætt nokkrum sinnum með Epstein en bundið enda á samskiptin þegar ljóst varð að þau myndu ekki skila neinu.

Fjársýslumaðurinn var handtekinn fyrir að hafa nauðgað og misnotað fjölda stúlkna undir lögaldri. Hann framdi sjálfsvíg í fangaklefa í New York í ágúst árið 2019.

Gengið var frá skilnaði Gates og eiginkonu hans Melindu á dögunum en Gates neitaði að svara fyrirspurn Wall Street Journal um það hvort tengsl hans við Epstein hefðu átt þátt í því að hjónabandið gekk ekki upp. Orðrómur hefur verið uppi þess efnis.

„Þetta er tími íhugunar og nú þarf ég að horfa til framtíðar,“ sagði Gates við CNN. „Fjölskyldan mun gróa eins vel og hún getur.“

Samkvæmt skilmálum skilnaðarins munu næstu tvö ár leiða í ljós hvort Bill og Melinda geta unnið saman að góðgerðastofnun sinni. Ef ekki, mun Bill greiða fyrrverandi eiginkonu sinni fyrir að ganga frá samstarfinu.

Gates segist þó vonast til þess að Melinda komi áfram að stofnuninni.

„Það væri örugglega best fyrir stofnunina. Melinda býr yfir ótrúlegum styrkleikum sem gera stofnunina betri.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×