Veiði

Eystri Rangá komin yfir 1000 laxa

Karl Lúðvíksson skrifar
Nýgengin lax úr Eystri Rangá
Nýgengin lax úr Eystri Rangá Mynd: KL

Eystri Rangá hefur tekið vel við sér eftir að hafa verið lengi í gang en áinn er sú fyrsta til að fara yfir 1.000 laxa markið í sumar.

Eystri Rangá hefur oft verið lengi í gang en á þannig sumrum fer hún oftar en ekki á skrið í lok júlí eða byrjun ágúst. Undanfarið hafa dagarnir verið að skila 60-70 löxum að meðaltali en inn á milli koma dagar með meiri veiði. Engin dagur hefur þó farið yfir 100 laxa ennþá en á sama tíma í fyrra var það daglegt brauð. Það er þó ekki alveg sanngjarnt að bera þessi tvö ár saman enda var sumarið í fyrra metsumar í ánni. 

Lax veiðist nú á öllum svæðum og göngur virðast vera stöðugar þó þær séu minni en í fyrra. Ekki ber mikið á tveggja ára laxi í það minnsta ekki í því magni sem menn áttu von á eftir jafn stórt smálaxaár og í fyrra en laxinn sem er að veiðast virðist engu að síður vera í góðum holdum svo það lítur út fyrir að hann hafi haft nóg að éta í sjónum. 

Nú verður áhugavert að fylgjast með næstu daga og vikur og sjá hvort það komi einhver stærri ganga í ánna en þeir sem hafa veitt í Eystri Rangá lengi þekkja vel þennan takt á henni þegar hún er lengi í gang en fer svo á fullt þegar áugst gengur í garð.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.