Styrkur til uppbyggingar og atvinnusköpunar í Búrkína Fasó

Heimsljós 28. júlí 2021 07:30

Haraldur Pálsson, stofnandi Áveitunnar ehf. og Ágústa Gísladóttir, deildarstjóri á alþjóða- og þróunarsamvinnuskrifstofu utanríkisráðuneytisins, við undirritun samningsins.

Áveitan ehf. fær tæplega þrjátíu milljóna króna styrk meðal annars til byggingar íbúðarhúsnæðis og til að bæta aðgengi að vatni og ræktarlandi.

Utanríkisráðuneytið hefur veitt fyrirtækinu Áveitunni ehf. tæplega þrjátíu milljóna króna styrk til uppbyggingar og atvinnusköpunar í Búrkína Fasó. Styrkurinn er veittur úr Samstarfssjóði við atvinnulífið um heimsmarkmið Sameinuðu þjóðanna.

Verkefnið miðar að uppbyggingu og atvinnusköpun á landsvæði sem ABC barnahjálp hefur til umráða í borginni Bobo-Dioulasso í vesturhluta Búrkína Fasó. Uppbyggingin felur meðal annars í sér aðgengi að vatni, ræktarlandi og byggingu íbúðarhúsnæðis.

Til stendur að bora eftir vatni og reisa vatnsturna á landsvæðinu og þá verða einnig settar upp sólarsellur sem tengjast vatnsdælum í þeim tilgangi að tryggja rafmagn og sjálfbærni vatnsflæðis. Enn fremur verður landið stikað og skipt upp fyrir ræktun mismunandi afurða, til að mynda fyrir maís, baunir, grænmeti, ávexti og hnetur. Stefnt er að því að rækta matvæli allt árið og til þess þarf að leggja vatnskerfi um svæðið. Auk þess verða byggð einföld raðhús fyrir flóttafólk og verður hverri fjölskyldu úthlutaður skiki af landinu til þess að rækta mat fyrir heimilið. Þá verður reistur múr umhverfis landið til þess að vernda það frá ágangi skepna sem ganga frjálsar.

Markmið verkefnisins er enn fremur að hluti af þeim mat sem ræktaður verður á landinu verði nýttur í skóla ABC barnahjálpar í Bobo-Dioulasso. Auk þess er áætlað að þeir foreldrar barna í skólanum sem koma munu að ræktuninni, ásamt þeim fjölskyldum sem búa munu á landinu, geti selt hluta af ræktuninni og þar með aflað sér tekna.

Áætluð verklok eru í lok árs 2023.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.

Þróunarsamvinna Búrkína Fasó

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.