Atvinnulíf

Leita til íslenskra kvenna eftir árangurssögum í samskiptum og velgengni

Rakel Sveinsdóttir skrifar
Unnur Magnúsdóttir
Unnur Magnúsdóttir Vísir/Aðsent

„Ríflega þrjátíu þúsund þátttakendur hafa sótt þessi námskeið og nú væri frábært að einhverjar konur gæfu sig fram og segðu okkur frá árangri sem þær hafa náð í sínu starfi með því að nota reglurnar,“ segir Unnur Magnúsdóttir ráðgjafi hjá Dale Carnegie um endurútgáfu bókarinnar Vinsældir og áhrif, þar sem ætlunin er að segja meðal annars frá árangri íslenskra kvenna sem náð hafa árangri í viðskiptum með því að vera góðar í samskiptum.

En hvað kemur til að nú er verið að kalla eftir árangurssögum frá íslenskum konum?

Upphafleg hugmynd árið 1936

Bókin Vinsældir og Áhrif kom fyrst út árið 1936 og jafn ótrúlega og það hljómar, nýtur hún enn mikilla vinsælda.

„Í bókinni er farið yfir 30 reglur í mannlegum samskiptum sem nýtast vel til að ná árangri. Þessar reglur byggja á frásögnum fólks í viðskiptalífinu og stjórnmálum sem segja frá því hvernig fólk hefur náð miklum árangri með því að vera meðvitað um samskipti sín og framkomu við annað fólk,“ segir Unnur og bætir við: „Og náð með þessu að byggja upp traust, afla samvinnu og veita öðrum innblástur.“

Höfundur bókarinnar er Dale Carnegie sem frá árinu 1912 hafði haldið námskeið víðs vegar í Bandaríkjunum til að þjálfa fólk og efla í samskiptafærni og fleiru.

Eitt sinn, sat útgefandi námskeið Dale og heyrði þar frásagnir fólks sem var að æfa sig í að halda ræður.

Þær frásagnir innihéldu oftar en ekki dæmisögur um hvernig fólk nær árangri í viðskiptum með því að vera góð í samskiptum,“ 

segir Unnur.

Útgefandanum datt þá í hug að Dale myndi gefa út bók og styðjast þá við frásagnir fólks sem höfðu nýtt sér reglurnar sem hann kenndi og náð árangri í viðskiptalífinu og í stjórnmálum.

Úr varð bókin Vinsældir og áhrif, sem á frummálinu heitir How to win Friends and Influence people.

Sló strax í gegn

Að sögn Unnar sló bókin strax í gegn árið 1936 og seldist þá í áður óþekktum upplögum.

Sjálfshjálparbókin Vinsældir og áhrif sló strax í gegn árið 1936 og er enn mikið notuð. Nú er leitað til íslenskra kvenna til að bæta við sögum frá konum í endurútgáfu bókarinnar.

Þó var hún gagnrýnd fyrir að vera einföld og grunn.

„Kannski er það einmitt ástæðan fyrir velgengninni. Hún er svo aðgengileg og reglurnar einfaldar fyrir fólk að beita í sínu lífi og hún fjallar um mannlega hegðun sem fólk getur samsvarað sig við. Þegar maður les reglurnar kemst maður að því að þær eru í raun allar kunnuglegar og eitthvað sem maður veit innst inni að skilar manni árangri. Bókin er því frábær áminning um að nota reglurnar og sögurnar sanna svo ágætið,“ segir Unnur.

Þá segir Unnur að á námskeiðum Dale Carnegie á Íslandi sé enn verið að styðjast við reglurnar úr bókinni.

„Þátttakendur eru almennt sammála um að þó svo að bókin sé gefin út 1936 þá standist reglurnar tímans tönn og eigi alveg jafn vel við núna og þær gerðu þá. Það má segja að þessi bók sé fyrsta sjálfshjálparbókin og aðrar bækur sem hafa komið út í kjölfarið séu að einhverju leiti að feta í fótspor þessarar,“ segir Unnur.

En þótt bókin njóti enn mikilla vinsælda, er þó einn hængur á.

Það vantar árangurssögur frá konum!

Dóttir Dale, Donna Carnegie, vinnur því nú að endurútgáfu bókarinnar. Af því tilefni, leitaði hún til Dale Carnegie á Íslandi, enda hafa námskeið Dale Carnegie verið í boði fyrir Íslendinga frá árinu 1965 og konur þar alltaf verið í miklum meirihluta þátttakenda.

„Bókin kom út árið 1936 og því augljóst að margar sögurnar bera einkenni þess tíma. Þannig eru til dæmis ekki margar sögur þar sem konur eru í leiðtogahlutverkinu og því langar Donnu að breyta,“ segir Unnur.

Íslenskar árangurssögur oft magnaðar

Unnur segir það vel valið af Donnu að leita til íslenskra kvenna. Ekki aðeins vegna þess að þær hafi verið í meirihluta þátttakenda Dale Carnegie námskeiða síðustu áratuga, heldur hafi þær margar frá góðum sögum að segja.

Við þjálfararnir heyrum allar frásagnir þátttakenda og er stundum orðavant yfir því hversu ótrúleg áhrif mannleg hegðun getur haft á árangur, hvort sem það er í starfi eða einkalífi,“ 

segir Unnur og nefnir dæmi: „Ég man eftir frásögnum þar sem fólk hafði veruleg áhrif á menningu vinnustaðarins, starfsánægju og árangur heildarinna með því að skoða eigin samskiptahegðun og tileinka sér reglurnar í bókinni.“

Unnur hvetur þessar konur nú til að hafa samband við Dale Carnegie á Íslandi og deila sínum sögum. Hægt er að senda henni póst á netfangið unnurm@dale.is.

Þessum sögum verður síðan komið á framfæri við Donnu Carnegie.

„Það væri auðvitað alveg meiriháttar gaman að hafa frásögn íslenskrar konu prýða síðurnar á Vinsældir og áhrif,“ segir Unnur.


Tengdar fréttir

Fimm bækur á lestrarlista Bill Gates í sumar

Eflaust teljast hjónaskilnaðarfréttir Bill Gates til mun vinsælli frétta en bókaáhugi Gates. Gates birtir þó reglulega bókalista á bloggsíðunni sinni, með bókum sem hann mælir sérstaklega með. 

Að velja rétta vinnustaðinn: Fjögur mikilvæg atriði

Við heyrum svo mikið um atvinnuleysi en minna um atvinnuleit eða val fólks á því starfi sem það vill ráða sig í. En öll höfum við val og þegar að því kemur að við erum að ráða okkur í nýtt starf, er mikilvægt að velta fyrir sér, hvort við séum að velja rétta vinnustaðinn fyrir okkur!

Ríkið innleiðir nýja stjórnendastefnu: Vilja hæfasta fólkið

„Stjórnendur ríkisins eiga að búa yfir hæfni og þekkingu til að geta brugðist við sífellt flóknara starfsumhverfi og vinna að breytingum í samfélaginu. Sú hæfni sem lögð er til grundvallar í stefnunni eru leiðtogahæfileikar, áhersla á árangursmiðaða stjórnun, samskiptahæfni og heilindi sem er svo útfærð nánar í stefnunni,“ segir Guðrún Jóhanna Guðmundsdóttir sérfræðingur hjá Kjara- og mannauðssýslu ríkisins í fjármála- og efnahagsráðuneytinu um nýja stjórnendastefnu sem ríkið vinnur nú að því að innleiða.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.