Heimsmarkmiðin

Neyðar­sjóður Sam­einuðu þjóðanna grípur inn í al­var­legt hungur

Heimsljós
Neyðarsjóður Sameinuðu þjóðanna er ein af fjórum áherslustofnunum og sjóðum Íslands í mannúðaraðstoð.
Neyðarsjóður Sameinuðu þjóðanna er ein af fjórum áherslustofnunum og sjóðum Íslands í mannúðaraðstoð. UNICEF/Roger LeMoyne

Neyðarsjóður Sameinuðu þjóðanna (CERF) ráðstafaði á dögunum tæplega 17 milljörðum íslenskra króna – 135 milljónum bandarískra dala – til að efla mannúðaraðgerðir í tólf löndum í Afríku, Ameríku og Miðausturlöndum. 

Gögn sem birt voru fyrr í mánuðinum sýndu að 350 þúsund einstaklingar drógu fram lífið við aðstæður sem eru sambærilegar hungursneyð.

„Hungursneyð skýtur upp kollinum á nokkrum stöðum núna, svo það má enginn tími fara til spillis. Þessi CERF úthlutun gæti skilið á milli lífs og dauða fyrir milljónir manna sem treysta á aðstoð til að lifa af. Með þessum fjármunum getum við veitt nauðsynjar eins og hreint vatn, skjól og mat fyrir fólkið sem þarf mest á því að halda, á þeim tíma sem þörfin er mest aðkallandi,“ segir Mark Lowcock, mannúðarstjóri Sameinuðu þjóðanna.

Ástandið er alvarlegast í Tigray héraði í Eþíópíu en hungursneyð er yfirvofandi í Búrkina Fasó, suðurhluta Madagaskar, norðausturhluta Nígeríu, Suður-Súdan og Jemen. Einnig verður fjármunum varið til hjálparsamtaka í Sýrlandi, Lýðstjórnarlýðveldinu Kongó, Venesúela, Tjad, Afganistan, Kamerún og Mósambík.

Neyðarsjóður Sameinuðu þjóðanna (Central Emergency Respone Fund, CERF) er ein af fjórum áherslustofnunum og sjóðum Íslands í mannúðaraðstoð. CERF leggur áherslu á snemmtækar og skilvirkar aðgerðir til að draga úr manntjóni og neyð og grípur inn í þar sem neyðin er viðvarandi og gleymd. Ákvarðanir um úthlutun undirfjármagnaðs neyðarástands byggist á ítarlegri greiningu á meira en 70 mannúðarvísum og víðtæku samráði við hagsmunaaðila.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.