Neytendur

Sekta BPO Inn­heimtu vegna „um­fangs­mikilla og al­var­legra“ brota á smá­lána­markaði

Atli Ísleifsson skrifar
BPO Innheimta er í eigu Guðlaugs Magnússonar sem gegnir stöðu framkvæmdastjóra. Tilkynnt var í apríl um kaup á öllum smálánakröfum Kredia, Hraðpeninga, Smálána, 1909 og Múla.
BPO Innheimta er í eigu Guðlaugs Magnússonar sem gegnir stöðu framkvæmdastjóra. Tilkynnt var í apríl um kaup á öllum smálánakröfum Kredia, Hraðpeninga, Smálána, 1909 og Múla.

Neytendastofa hefur sektað innheimtufyrirtækið BPO Innheimtu um 1,5 milljón króna fyrir „umfangsmikil“ og „alvarleg“ brot á markaði. Starfshættir fyrirtækisins varðandi kröfur í heimabanka eru sagðir hafa verið villandi gagnvart neytendum og brotið í bága við góða og réttmæta viðskiptahætti, en kröfurnar hækkuðu umtalsvert skömmu eftir birtingu þeirra.

Á vef Neytendastofu segir að leitað hafi skýringa hjá BPO Innheimtu á viðskiptaháttum fyrirtækisins í kjölfar ábendinga frá neytendum, Neytendasamtökunum og fjölmiðlaumræðu í vor. Til álita hafi komið hvort tilkynning BPO Innheimtu og aðferðir við innheimtu á kröfum sem keyptar voru frá gömlu smálánafyrirtækjunum hafi falið í sér óréttmæta og villandi viðskiptahætti.

BPO Innheimta var stofnað fyrr á árinu og stofnaði í samstarfi við BPO í Bretlandi og sérhæfði sig í innheimtulausnum fyrir fyrirtæki, stofnanir og einstaklinga. Fyrirtækið, sem er í eigu Guðlaugs Magnússonar sem gegnir stöðu framkvæmdastjóra, tilkynnti í apríl um kaup á öllum smálánakröfum Kredia, Hraðpeninga, Smálána, 1909 og Múla. Fljótlega tóku kvartanir að streyma til Neytendasamtakanna vegna reikninga sem fyrirtækið sendi fólki með eindaga sama dag.

Hafnaði ásökunum um óréttmæta og villandi viðskiptahætti

Félagið sjálft hafnaði því að félagið hafa stundað óréttmæta og villandi viðskiptahætti.Í tilkynningu frá Neytendastofu segir að félagið hafi sent skuldurum tilkynningu um að það hafi keypt kröfusafn smálána og að vextir og lántökukostnaður hafi verið felldir niður. 

„Þá taldi BPO Innheimta að kröfurnar sem stofnaðar voru í netbönkum skuldara hafi verið réttar og birting þeirra geti ekki talist villandi eða óréttmætir viðskiptahættir.

Skuldarar hafi haft tækifæri til að greiða kröfur félagsins án vanskilakostnaðar þótt tíminn til þess hafi verið skammur. Kerfistakmarkanir í netbönkum geri það að verkum að kröfurnar virtust hækka daginn eftir og komi í veg fyrir að hægt sé að birta sundurliðun kröfunnar. Því sé ekki um villandi eða óréttmæta viðskiptahætti að ræða,“ segir um rökstuðning BPO Innheimtu í málinu.

Að mati Neytendastofu voru brot BPO Innheimtu bæði umfangsmikil og alvarleg og því óhjákvæmilegt að leggja stjórnvaldssekt á félagið.Getty

Braut í bága við góða viðskiptahætti

Neytendastofa komst hins vegar að þeirri niðurstöðu að birting umræddra krafna í netbönkum neytenda, með öllum gjöldum og áföllnum vanskilakostnaði, áður en neytendur voru upplýstir um efni eða eiganda krafnanna, bryti í bága við góða viðskiptahætti.

„Þá var það niðurstaða Neytendastofu að birting krafna með gjalddaga og eindaga sama dag og kröfurnar voru birtar í netbönkum neytenda þar sem kröfurnar hækkuðu umtalsvert skömmu eftir birtingu þeirra fæli í sér óréttmæta viðskiptahætti. Enn fremur var það niðurstaða Neytendastofu að tilkynning BPO Innheimtu, sem bæði var send í tölvupósti til neytenda og birt í Fréttablaðinu þann 14. júní 2021, þar sem staðhæft var að allri óvissu um lögmæti krafnanna hafi verið eytt, hafi verið villandi gagnvart neytendum. Í tilkynninguna skorti upplýsingar sem almennt skipta máli fyrir neytendur og hún var til þess fallin að hafa áhrif á ákvörðun neytenda um að eiga viðskipti, auk þess að brjóta í bága við góða viðskiptahætti.

Að mati Neytendastofu voru brot BPO Innheimtu bæði umfangsmikil og alvarleg og því óhjákvæmilegt að leggja stjórnvaldssekt á félagið. Þó var einnig litið til samstarfsvilja félagsins og þeirra aðgerða sem BPO Innheimta greip til að eigin frumkvæði og því var sektarfjárhæð ákveðin 1.500.000 krónur.“

Hægt er að lesa ákvörðun Neytendastofu í heild sinni hér.  





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×