Neytendur

Helmings­af­­sláttur á Ísey Skyr Bar heyrir brátt sögunni til

Sylvía Hall skrifar
Margir viðskiptavinir Ísey Skyr Bar hafa nýtt sér hið fræga morguntilboð í nokkur ár. Nú verður breyting á og 50 prósent afsláttur mun víkja fyrir nýjum verðum.
Margir viðskiptavinir Ísey Skyr Bar hafa nýtt sér hið fræga morguntilboð í nokkur ár. Nú verður breyting á og 50 prósent afsláttur mun víkja fyrir nýjum verðum. Facebook/Vísir

Viðskiptavinir Ísey Skyr Bar munu framvegis ekki fá 50 prósenta afslátt af drykkjum, söfum og skálum frá og með 1. júní þegar ný morguntilboð taka gildi. Rekstrarstjóri segir breytingarnar í samræmi við verð sem sambærilegir staðir hafa verið að bjóða upp á og þetta sé hluti af frekari breytingum á stöðunum.

Lengi vel hefur allt á matseðli verið á hálfvirði milli 7:30 og 10 virka daga og 10 og 12 um helgar. Frá og með þriðjudeginum verða föst verð í boði á þeim tímum og munu skálar af matseðli kosta 1.295 krónur og allir drykkir í millistærð 1.095 krónur.

Sem dæmi má nefna að skálin 1001 nótt, sem er ein sú vinsælasta sem Ísey býður upp á, kostar 1.795 krónur. Hingað til hefur hún því kostað 898 krónur með morgunafslætti en mun á nýju tilboðsverði kosta 1.295 krónur. Tilboðsverðið á skálinni verður því 44 prósentum hærra.

Fyrra tilboð tímabundið

Ninna Kristinsdóttir, rekstrarstjóri Ísey Skyr Bar, segir breytinguna til þess fallna að samræma verð við aðra staði sem bjóða upp á sambærilegar vörur. Nýir staðir hafa verið að bjóða upp á morguntilboð á sambærilegu verði og hið nýja á Ísey.

„Við erum með 50 prósenta afslátt sem er mikill afsláttur. Við erum eingöngu að breyta morguntilboðinu og samræma okkur við aðra staði og aðra sem eru í svipuðu og eru með sirka 30 prósenta afslátt,“ segir Ninna. „Það er engin framlegð í því fyrir nokkurn stað. Við erum búin að vera með þetta morguntilboð mjög lengi en við höfum verið að láta fólk vita að það sé breyting yfirvofandi.“

Jón Viðar Stefánsson, rekstrarstjóri þjónustustöðva N1, sem festi kaup á rekstri skyrbarsins á þjónustustöðvum sínum í fyrra, segir fyrri afslátt aðeins hafa verið tímabundinn. Nú hafi verið kominn tími á að skipta því út.

„Það munu koma önnur og fleiri tilboð í staðinn. Þetta tilboð var tímabundið og nú er það búið.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×