Íslendingar mæta frægustu og bestu FIFA-spilurum heims

Ingvi Þór Sæmundsson skrifar 20. maí 2021 09:30

Ísland hefur leik í undankeppni FIFA eNations Cup í dag. Næstu tvo daga leikur íslenska liðið sex leiki og verða þeir allir sýndir beint á Stöð 2 eSport.

Auk Íslands eru Pólland, England, Eistland, Belgía, Ísrael og Króatía í riðlinum í undankeppninni. Fjögur efstu liðin komast áfram í næstu umferð sem verður leikin á morgun og laugardaginn.

Íslenska liðið er skipað þeim Aroni Þormari Lárussyni, Tindi Örvari Örvarssyni, Bjarka Má Sigurðssyni og Alexander Aroni Hannessyni.

Riðilinn sem Ísland er í er afar sterkur. England er til að mynda með eitt besta lið heims og eru með hina öflugu hashtag Tom og Tekkz innan sinna raða. Þeir eru sennilega frægustu og bestu FIFA-spilarar heims.

Tekkz (Donovan Hunt) hashtag Tom (Tom Leese) hafa báðir unnið ensku úrvalsdeildina í eFótbolta, Tekkz með Liverpool en hashtag Tom með Watford. Tekkz hefur einnig unnið Meistaradeildina í eFótbolta.

Hashtag Tom og Tekkz, eða Tom Leese og Donovan Hunt, eins og þeir heita réttum nöfnum.vísir/dan mullan

Eftir góðan árangur í æfingaleikjum er Ísland talið ellefta besta lið Evrópu.

Ísland mætir Eistlandi, Englandi, Króatíu og Belgíu í dag og Póllandi og Ísrael á morgun. Bein útsending frá undankeppninni hefst á Stöð 2 eSport klukkan 14:50 í dag og á morgun.

FIFA eNations Cup fór í fyrsta sinn fram fyrir tveimur árum og þá hrósaði Frakkland sigri. Frakkar unnu Argentínumenn í úrslitaleik, 3-2.

Rafíþróttir