Veiðimenn eru farnir að hafa töluverðar áhyggjur af vatnsbúskapnum fyrir sumarið en sem dæmi er Norðurá í dag aðeins með um helming sumarvatns eða um 7-8 rúmmetra og þetta á við um flestar árnar á vesturlandi og norðurlandi vestra kannski að Langá undanskilinni en hún býr ágætlega við vatnsforða þar sem það er vatnsmiðlun við Langavatn.

Það er samt töluverður snjór á fjöllum fyrir norðan og nokkur forði sem liggur þar enda hefur snjórinn bráðnað mjög hægt á þessu kalda vori svo það er einhver von þar. Það er þó nokkuð ljóst að það þarf að rigna reglulega, vel og hressilega í sumar til að ár eins og Norðurá, Þverá og Kjarrá, Víðidalsá, Laxá í Kjós og Hrútafjarðará bara svo nokkrar séu nefndar verði ekki  vatnslitlar í sumar eins og þær voru fyrir tveimur árum en það sumar var eitt það versta sem veiðimenn muna eftir. Árnar þá runnu varla milli hylja og laxinn lá í bunkum í dýpstu hyljunum í súrefnislitlu vatni og biðu þess að það rigndi. Þegar það loksins rigndi þá var líka haustveiðin mjög góð.