Það sem af er þessu tímabili hefur veiðin verið afar róleg en þar liggur ástæðan fyrst og fremst í köldu vorinu en það er fljótt að breytast. Bleikjan er þarna, það er ljóst enda sést uppítaka víða í vatninu þegar það lygnir. Þeir sem þekkja þetta vatn vel segja að það sé bara spurning um næstu daga þegar veiðin ætti að vera taka vel við sér og þá skiptir mestu máli að vatnið hafi náð að hlýna aðeins.

Flugurnar sem mikið er verið að nota eru til dæmis Marfló, Pheasant Tail, Krókurinn og Beykir en það er ekki nóg að vera með réttu fluguna, það þarf líka að vita hvernig á að egna fiskinn til að taka hana. Á þessum tíma er oft best að koma henni vel niður, annað hvort á löngum taum eða með sökklínu en intermediate er oft líka nóg. Það er líklega engin fiskur við landið sem bragðast jafnvel og sjóbleikja og þess vegna alveg skiljanlegt að veiðimenn skuli sækjast í að veiða hana.