Lúxusrafbíll á götunum

Kristinn Ásgeir Gylfason skrifar 12. maí 2021 07:00

Nýr Mercedes-Benz EQS lúxusrafbíll hefur sést síðustu daga á götum höfuðborgarsvæðisins. EQS var flogið til Íslands á laugardaginn í tengslum við Mid Season Invitational tölvuleikja-keppnina sem er haldin í Laugardalshöll þessa dagana.

Meðfylgjandi er fréttatilkynning frá Öskju.

Mercedes-Benz er einn af styrktaraðilum keppninnar sem er gríðarlega vinsæl um heim allan. EQS verður í tökum fyrir keppnina alla vikuna áður en honum verður svo flogið aftur út um næstu helgi. Það eru vafalaust margir spenntir fyrir því að sjá bíllinn á götunum þar sem honum verður ekið á milli tökustaða.

EQS er hátæknivædd lúxuskerra og flaggskip Mercedes-Benz í rafbílum. Ytra byrði EQS er hannað sem ein lína (e. One Bow Design) sem veldur því að bíllinn er einstaklega straumlínulagaður en bíllinn hefur loftmótstöðugildið 0,20 Cd sem er það minnsta í heimi meðal fjöldaframleiddra bíla. Innanrýmið verður hlaðið lúxus og munaði auk mikillar tækni enda er bíllinn einn tæknivæddasti bíll sem framleiddur hefur verið. Nýja Hyperscreen mælaborðið verður í boði í EQS en það er tækni án hliðstæðu í fólksbíl en þar er um að ræða 141cm háskerpuskjá sem teygir anga sýna yfir allt mælaborðið. EQS er með nýjustu útgáfuna af MBUX margmiðlunarkerfinu sem sér til þess að engum leiðist um borð í bílnum og veitir aðgang að allri afþreyingu og upplýsingum sem völ er á. Burmeister hljóðkerfi með 15 hátölurum veitir einstakan hljóm í innanrými bílsins.

Með stærri rafhlöðunni sem í boði er skilar EQS yfir 700km drægi samkvæmt WLTP og í ákveðinni útfærslu af bílnum má ná allt að 770km samkævmt WLTP staðli. Minni rafhlaðan skilar 640 km samkvæmt WLTP staðlinum. Öflugri gerðin er 523 hestafla með hámarkstog alls 855 Nm. Minni rafhlaðan skilar 333 hestöflum og 568 Nm í hámarkstogi. Framdrifsútfærsla á EQS með stærri rafhlöðunni er 6,3 sekúndur 0-100 km hraða og í aldrifs útfærslunni aðeins 4,3 sekúndur 0-100 km hraða.

„Það er afar spennandi og raunar alveg einstakt fyrir okkur hér á Íslandi þar sem bíllinn er hvergi kominn í sölu í heiminum. Hann hefur aðeins verið frumsýndur en fyrstu bílar koma á göturnar í lok sumars/haust. Við eigum von á bílnum hingað til lands í sölu í haust,“ segir Jónas Kári Eiríksson hjá Bílaumboðinu Öskju sem er umboðsaðili Mercedes-Benz á Íslandi.

Vistvænir bílar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.