Handbolti

Draumur Íslands lifir með sigri á sexföldum heimsmeisturum

Sindri Sverrisson skrifar
Ísland er í kapphlaupi við Sviss og fleiri lið um að komast í 8-liða úrslit á HM, og eftir tap gegn Sviss er Ísland ansi aftarlega í því hlaupi.
Ísland er í kapphlaupi við Sviss og fleiri lið um að komast í 8-liða úrslit á HM, og eftir tap gegn Sviss er Ísland ansi aftarlega í því hlaupi. EPA-EFE/URS FLUEELER

Það þarf vissulega bjartsýni í anda Pollýönnu til að velta fyrir sér þeim möguleika en Ísland á samt enn von um að komast í 8-liða úrslit HM í handbolta í Egyptalandi.

Vonin sú veltur á því að Ísland vinni sigursælustu þjóð í sögu HM, Frakka, í dag kl. 17 og svo liðið sem leikið hefur til úrslita á síðustu tveimur heimsmeistaramótum, Norðmenn, á sunnudaginn. 

Fyrir lið sem tapað hefur leikjum gegn Portúgal og Sviss virðist möguleikinn á því ekki ýkja mikill, en hann er þó til staðar.

Ef að Ísland vinnur Frakkland, sama með hvaða mun, og Noreg með fimm marka mun, þarf liðið varla að treysta á önnur úrslit. Til dæmis væri þá nóg að Noregur vinni Alsír í kvöld.

Ef að úrslit í öðrum leikjum falla með Íslandi væri „nóg“ fyrir Ísland að vinna leikina við Frakkland og Noreg með eins marks mun, en það yrði vissulega ógleymanlegt þrekvirki að vinna báða þessa leiki og grunnforsenda fyrir möguleikanum á að komast áfram.

Staðan eftir þrjár umferðir og leikirnir sem eftir eru:

Staðan:

  • Frakkland 6
  • Portúgal 4
  • Noregur 4
  • Ísland 2
  • Sviss 2
  • Alsír 0

Leikir í dag:

  • 14.30 Sviss – Portúgal
  • 17.00 Ísland – Frakkland
  • 19.30 Noregur – Alsír

Leikir á sunnudag:

  • 14.30 Alsír – Sviss
  • 17.00 Ísland – Noregur
  • 19.30 Portúgal – Frakkland

Tvö efstu lið milliriðilsins komast áfram í 8-liða úrslit. Hafa ber í huga að verði lið jöfn að stigum gilda innbyrðis úrslit í leikjum þeirra. Verði til dæmis þrjú lið jöfn, og hafi hvert þeirra unnið einn leik en tapað einum í innbyrðis viðureignum þeirra þriggja, ræður samanlögð markatala úr þessum innbyrðis leikjum því hvernig þau raðast.

Ísland ætti mun raunhæfari möguleika á því að komast í 8-liða úrslit ef liðið hefði ekki tapað 20-18 gegn Sviss og 25-23 gegn Portúgal.EPA-EFE/Anne-Christine Poujoulat

Hvernig viljum við þá að hinir leikirnir fari, svo að Íslandi dugi að vinna sína leiki? Hægt er að teikna upp 81 sviðsmynd út frá því að Ísland vinni bæði Noreg og Frakkland, svo við látum það nú ógert.

Til einföldunar skulum við reikna með að Alsír tapi báðum sínum leikjum, gegn Noregi og Sviss (Það gæti þó hjálpað Íslandi ef að Sviss tapaði gegn Alsír í lokaumferðinni, sem er ekki óraunhæft). Þá standa eftir leikir Sviss og Portúgals í dag, og Portúgals og Frakklands á sunnudag. Við skulum skoða hvaða úrslit henta þar.

Hvað ef Ísland vinnur báða sína leiki og Alsír tapar báðum sínum?

Ef Portúgal vinnur bæði Sviss og Frakkland fer Ísland þá með Portúgal í 8-liða úrslitin. Þessi möguleiki hentar því Íslandi best. Eins marks sigur gegn Frakklandi og Noregi væri nóg. Lokastaða: Portúgal 8, Ísland 6, Frakkland 6, Noregur 6, Sviss 4, Alsír 0.

Ef Portúgal vinnur Sviss en Frakkland vinnur Portúgal þyrfti sigur Íslands á Noregi að hafa verið með fjögurra marka mun (eða þriggja marka ef Ísland skoraði 30 mörk í þeim leik) til að Ísland fylgi Frakklandi í 8-liða úrslitin. Lokastaða: Frakkland 8, Ísland 6, Noregur 6, Portúgal 6, Sviss 4, Alsír 0.

Ef Sviss vinnur Portúgal og Frakkland vinnur Portúgal þyrfti sigur Íslands á Noregi að hafa verið með fimm marka mun svo að Ísland fylgi Frakklandi í 8-liða úrslit (nema að Sviss vinni ekki Alsír). Lokastaða: Frakkland 8, Ísland 6, Noregur 6, Sviss 6, Portúgal 4, Alsír 0.

Ef Sviss vinnur Portúgal en Portúgal vinnur Frakkland gætu fimm lið orðið jöfn með 6 stig. Þá myndi innbyrðis markatala úr leikjum þessara fimm liða ráða því hvaða tvö lið færu áfram.

Ef Portúgal og Sviss gera jafntefli kæmist Ísland áfram ef ekki yrði jafntefli hjá Frakklandi og Portúgal. Ef jafntefli yrði í báðum þessum leikjum þyrfti Ísland að hafa unnið Noreg með fjögurra marka mun (eða þriggja marka ef Ísland skoraði 30 mörk í þeim leik) til að Ísland fylgi Frakklandi í 8-liða úrslitin.

Eins og fyrr segir er fjöldi annarra möguleika í stöðunni en möguleikinn á að Ísland endi HM sem eitt af þeim átta bestu í heimi er sem sagt enn til staðar. Liðið þarf bara að vinna Frakkland og Noreg, og eldingu hefur lostið niður tvisvar á sama stað.


Tengdar fréttir

„Við kol­féllum á prófinu, því miður“

Ásgeir Örn Hallgrímsson, fyrrum landsliðsmaður í handbolta og sérfræðingur Seinni bylgjunnar, segir íslenska landsliðið hafa fallið á prófinu í leiknum gegn Sviss. Leikurinn tapaðist 20-18 og var sóknarleikur Íslands í molum frá upphafi til enda.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.