Heimsmarkmiðin

Bandaríkin á ný til liðs við WHO og Parísarsamninginn

Heimsljós
WHO

Ákvörðun fyrrverandi Bandaríkjaforseta um að segja skilið við Alþjóðaheilbrigðisstofnunina hefur verið snúið við.

Úrsögn Bandaríkjanna úr Alþjóðaheilbrigðisstofnuninni (WHO) og yfirlýsing um að virða ekki Parísarsamninginn um loftslagsbreytingar hafa verið afturkallaðar. Tilskipanir þessa efnis voru undirritaðar örfáum klukkustundum eftir að Joseph Biden sór embættiseið sem forseti Bandaríkjanna.

António Guterres aðalframkvæmdastjóra Sameinuðu þjóðanna barst formleg tilkynning í fyrradag þess efnis að Bandaríkin hefðu á ný gengið til liðs við Parísarsamninginn, að því er fram kemur í frétt Upplýsingaskrifstofu Sameinuðu þjóðanna (UNRIC). Bandaríkin undirrituðu samninginn 2015. Trump fyrrverandi Bandaríkjaforseti sagði sig frá samningnum. Að sögn Stéphane Dujarric talsmanns Guterres aðalframkvæmdastjóra tekur Parísarsamningurinn gildi í Bandaríkjunum 19. febrúar næstkomandi.

Ákvörðun fyrrverandi Bandaríkjaforseta um að segja skilið við Alþjóðaheilbrigðisstofnunina hafði hins vegar ekki tekið gildi. Biden lét verða eitt sitt fyrsta verk að skipa svo fyrir að æðsti maður smitsjúkdómamála í Bandaríkjunum, Dr. Anthony Fauci, skyldi taka þátt í fundi framkvæmdastjórnar WHO sem fram fór í gær.

António Guterres fagnar þessum yfirlýsingum. Hann minnir á að á nýliðnum leiðtogafundi hafi ríki sem stóðu fyrir helmingi losunar koltvísýrings í andrúmsloftið heitið því að stefna að kolefnisjafnvægi fyrir miðja öldina.

„Yfirlýsing Bidens forseta um skuldbindingu Bandaríkjanna hækkar þetta hlutfall í tvo þriðju. En það er enn mikið verk óunnið,” segir Guterres.

„Við hlökkum til þess að Bandaríkin taki forystu um að hraða aðgerðum ríkja heims til að ná kolefnisjafnvægi. Til þess þarf nýjar landsáætlanir í samræmi við Parísarsamninginn. Þeim ber að fela í sér metnaðarfull markmið fyrir árið 2030. Ekki má heldur gleyma fjármögnun loftslagsaðgerða í aðdraganda COP26 fundarins í Glasgow síðar á árinu,“ segir í yfirlýsingu aðalframkvæmdastjórans.

Hann fagnar jafnframt ákvörðun Bidens um WHO. „Nú er tími einingar og að alþjóða samfélagið taki höndum saman um að stöðva veiruna. Takast þarf á við hrikalegar afleiðingar hennar,“ sagði Guterres. Í frétt UNRIC segir að sérstaka skipit máli að Bandaríkin taki þátt í COVAX samstarfinu um útvegun bóluefnis.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×