Finnur fyrir aukinni eftir­sókn hjá Seyð­firðingum eftir sál­rænum stuðningi

Þegar hefur sú breyting tekið gildi að sálfræðingur muni vera á Seyðisfirði einu sinni í viku.

„Svo hefur orðið sú breyting sem ég fagna mjög og er mjög dýrmæt í þessum aðstæðum sem við erum í núna, félagsþjónustan hefur sálfræðing á sínum snærum, sem er nýtilkomið, og það hefur orðin mjög aukin þjónusta geðheilsuteymis HSA. Mjög öflugur sálfræðingur leiðir það starf og þau eru líka komin með geðlækni sem við höfum aðgang að,“ segir Sigríður.

Hún segist hafa fundið fyrir mikill aukinni þörf Seyðfirðinga eftir sáluhjálp.

„Þetta er langtímaverkefni, það er engin úrvinnsla byrjuð. Fólk er rétt ennþá í yfirstandandi aðstæðum. Til dæmis var rýming um helgina og öllum var mjög brugðið þegar það var kannski einhver hætta á að það væri sprunga í skriðusárinu. Ástandið er ennþá yfirstandandi,“ segir Sigríður.

Hún segir það hafa skipt miklu máli að strax þegar rigningarnar byrjuðu í desember og fyrstu skriðurnar féllu fundaði samráðshópur um áfallahjálp. Þar hafi fulltrúi kirkjunnar verið, félagsþjónustu, heilsugæslunnar, Rauða krossins og lögreglu.

„Það hefur verið frá fyrstu stundu unnið í sálrænum stuðningi. Strax þegar einhver óvissa skapast, það er einhver rýming og viðvarandi rigning og ástand þá er strax alveg þörf fyrir sálgæslu. Svo þegar stóra skriðan fellur og það er rýming og allt sveitarfélagið í einhverjum ótrúlegum aðstæðum, þá er strax tryggð áfallahjálp,“ segir Sigríður.

„Ýmsir aðilar eru betur búnir en fyrir örfáum árum, innan Rauða krossins hefur fólk markvisst verið þjálfað í því að veita sálrænan stuðning, eins og strax þarna í fjöldahjálparstöðinni á Egilsstöðum og svo áfram þegar við máttum fara heim aftur,“ segir Sigríður.

Ástandið enn yfirstandandi

Hún segir að fólki hafi verið mjög brugðið í vikunni þegar grunur var um að sprunga í skriðusári stóru skriðunnar væri óstöðug.

„Ástandið er ennþá yfirstandandi. Þau sem misstu heimili sín og þau sem búa á ótryggum svæðum þurfa aðstoð og svo ýfir þetta upp gömul sár, fólk hefur upplifað skriður og snjóflóð og alls konar. Þetta er mjög stórt verkefni og við erum ótrúlega ánægð með allt sem er gert,“ segir Sigríður.

Hún segir samstöðu Seyðfirðinga hafa skipt lykilmáli. Samtöl við fólk í sömu aðstæðum skipti miklu máli og það sé sú áfallahjálp sem flestir þurfi á að halda.

„Maður fann það líka á milli hátíðanna og núna þegar fólk er að mæta í fjöldahjálparstöðina að það var ótrúlega mikilvægt að hitta fólk í sömu sporum og tala við það. Það er alveg ómetanlegt, það er áfallahjálp og sú áfallahjálp sem flestir þurfa. Við finnum alveg að það er þörf fyrir allan þennan stuðning,“ segir Sigríður.

Hún segist mjög ánægð með viðbrögð yfirvalda.

„Ég er mjög ánægð með það og svo sá ég stuttu seinna að það væri búið að tryggja að það yrði hérna sálfræðingur. Ég held að það sé mikil þörf fyrir þetta og þetta er mikils metið.“