Icelandair gagnrýnir fréttaflutning um laka bókunarstöðu

Forsvarsmenn Icelandair Group hf. segja rekstur félagsins ekki verri en reiknað var með í áætlunum þess. Fréttaflutningur um laka bókunarstöðu á sumum flugleiðum Icelandair hefur að sögn þeirra skapað umræðu um að svo sé.

„Það er rangt, enda hefur ekkert komið fram í nefndum fréttum sem ekki hefur komið fram í tilkynningum frá Icelandair Group til kauphallar. Í tilkynningu sem fylgdi ársuppgjöri Icelandair Group hinn 6. febrúar síðastliðinn kom fram að bókanir fyrir fyrstu þrjá mánuði ársins færu hægar af stað en ráðgert var. Þegar á heildina er litið standa þessar áætlanir óhaggaðar, þótt sumir þættir geti verið ívið betri en reiknað var með og aðrir þættir ívið lakari," segir í tilkynningu Icelandair. Þar segir að afkomuspá félagsins hafi ekki breyst og að bókunarstaða fyrir háannatíma og seinni hluta þessa árs sé betri en upphaflegar áætlanir gerðu ráð fyrir.

Fréttaflutningurinn sem Icelandair Group vísar í tengist að öllum líkindum frétt Viðskiptablaðsins frá því í síðustu viku um að eftirspurn eftir flugsætum hjá Icelandair á milli Íslands og Bretlands hafi minnkað undanfarið.