Koma á rannsóknarsetri um ál

Skrifað var undir viljayfirlýsingu um stofnun rannsóknarseturs, sem á að efla nýsköpunar- og þróunarstarf í áliðnaðinum, á ársfundi Samtaka álframleiðenda (Samál) í gær.

Ragnheiður Elín Árnadóttir iðnaðarráðherra og fulltrúar Samáls, Háskóla Íslands, Háskólans í Reykjavík og Nýsköpunarmiðstöðvar undirrituðu viljayfirlýsinguna á fundi Samáls í Hörpu.

Í yfirlýsingunni segir að stofnun setursins muni stuðla að auknu samstarfi þar sem leitað verði leiða til að auka virðisauka, efla útflutning og stuðla að fjölbreyttara atvinnulífi.

„Áliðnaðurinn og tengd starfsemi hefur mikla þýðingu í íslensku efnahagslífi enda hefur útflutningur á áli verið einn stærsti liður í útflutningstekjum landsins. Með samstilltu átaki verður unnið að því að auka samkeppnishæfni áliðnaðarins og tengdra framleiðslu- og þjónustugreina á Íslandi,“ segir í yfirlýsingunni.