„Ég ætla ekki að gefast upp, Fresca verður að lifa áfram,“

„Þú nærð ákkúrat í mig þegar ég er að lesa mig til um undirskriftarsafnanir á netinu. Ég ætla ekki að gefast upp, Fresca verður að lifa áfram,“ segir Magnús Ragnarsson, framkvæmdastjóri markaðs- og vörusviðs Símans og annálaður aðdáandi drykksins Fresca. Vífilfell tilkynnti í dag að framleiðslu drykksins yrði hætt vegna samdráttar í sölu.

„Ég er farinn að skipuleggja einhverjar aðgerðir. Ég sætti mig ekki við þetta,“ segir Magnús.

Þú hlýtur að vera í öngum þínum eftir þessa tilkynningu?

„Ég er nú ekki búinn að gefa upp vonina að Vífilfell hætti við þetta. Ég er búinn að drekka Fresca í  fjöldamörg ár og get ennþá sungið fyrir þig fyrstu auglýsinguna sem var birt hér á landi,“ svarar Magnús og byrjar að raula:

„Taste like a soft drink – Works like a diet drink..“

Agnes Guðnadóttir, dóttir Guðna Ágústssonar fyrrum ráðherra, er einnig einlægur Fresca-aðdáandi. „Mér finnst þessi drykkur alveg ótrúlega góður. Við feðginin drekkum þetta mikið, en ég hef ekki séð marga aðra drekka þetta, þannig að það kemur mér svosem ekkert á óvart að framleiðslunni hafi verið hætt.“

Í tilkynningu frá Vífilfelli kemur fram að það Fresca sem enn er til í búðum landsins muni endast í um tvær vikur. „Ég ætla bara að hamstra eins og ég get,“ segir Agnes.

Hún segist vera tilbúin að styðja Magnús í hans aðgerðum. „Já, ég er bara „all-in“ eins og sagt er. Ég er tilbúin. Ætli ég hætti ekki við að kjósa bara og einbeiti mér að þessu,“ segir hún og hlær.