Ætlaði aldrei að senda ávísanir í pósti

Ekki stóð til að senda þeim sem eiga að fá niðurfellingu á skuldum ávísun í pósti strax í sumar. Þetta kemur fram í viðtali við Sigmund Davíð Gunnlaugsson forsætisráðherra í Kjarnanum, nýju rafrænu tímariti sem kom út í dag.

„Ég reyndi að eyða þeim misskilningi í kosningabaráttunni. Það hefur alltaf legið ljóst fyrir að það tæki tíma til að skapa aðstæður þar sem þetta væri framkvæmanlegt. Vinna við það er samkvæmt áætlun," segir Sigmundur Davíð.

Forsætisráðherra segir í viðtalinu að það fari eftir því hvernig ákveðnar forsendur þróast hvort sérfræðihópur, sem á að útfæra skuldaniðurfærsluna, nái að skila af sér í nóvember eins og þingsályktunartillaga sem samþykkt var gerir ráð fyrir. Í stjórnarsáttmálanum hafi verið opnað á hina svokölluðu leiðréttingarsjóðsleið, meðal annars vegna óvissu um þá þróun. Hins vegar sé engin ástæða til að ætla að sérfræðihóparnir skili ekki af sér tímanlega.

„Þetta er það stórt mál að það verður alltaf umdeilt. Mér sýnist hluti stjórnarandstöðunnar ætla að vera á móti niðurstöðunni, hver sem hún verður. En vonandi verða sem flestir sáttir. Við munum hafa það sem meginmarkið í þessari niðurstöðu um skuldalækkanir að hún snúist um jafnræði. Út frá þróuninni að undanförnu þá hefur hún ekki útilokað eina leið frá annarri," segir Sigmundur Davíð í viðtalinu við Kjarnann. Hann vill ekki nefna ákveðnar dagsetningar í þeim efnum en segir að skuldaniðurfellingar megi ekki dragast óhóflega.

„Það er hins vegar alveg ljóst að því fyrr sem menn geta eytt þeirri óvissu sem hefur verið ríkjandi í nokkur ár um skuldamál heimilanna, þeim mun betra verður það fyrir samfélagið. Þannig að það liggur á,“ segir SIgmundur Davíð.

Lesa má viðtalið við Sigmund Davíð í heild sinni á heimasíðu Kjarnans.