Seðlabanki sagður linur í verðbólguslag

„Tónninn er ekki eins harður og við höfðum gert ráð fyrir og ég hélt að nefndin myndi koma með meiri sýn á það hver stefna þeirra verður með haustinu. Við veltum því fyrir okkur hvort sú leikáætlun sem lagt var af stað með í vor sé að virka sem skyldi,“ segir Ásdís Kristjánsdóttir, forstöðumaður greiningardeildar Arion banka, um þá ákvörðun Seðlabanka Íslands að halda stýrivöxtum óbreyttum.

Ásdís segir að Seðlabankanum hafi ekki tekist að endurheimta þann gjaldeyri sem nýttur hefur verið til að styðja við krónuna. Þá hafi horfurnar ekki skánað úti í heimi og viðskiptakjör séu að versna enn frekar, þannig að útlitið sé ekki gott. Hún telur erfiða kjarasamninga fram undan. „Við teljum að peningastefnunefndin hefði mátt vera skýrari um hvers megi vænta ef við sjáum hér óhóflegar launahækkanir í vetur,“ bætir Ásdís við. Seðlabanki Íslands tilkynnti í gær að vöxtum bankans yrði ekki breytt þrátt fyrir svarta verðbólguspá.

Greiningaraðilar undrast mildi yfirlýsingarinnar og segjast hafa búist við harðari viðbrögðum við lakari verðbólguvæntingum og versnandi horfum. „Mér þykir undarlegt af hverju þeir gefa ekki meira undir fótinn með hækkun á stýrivöxtum á næstunni til þess að ná þessum væntingum niður og þannig lenda málinu á skynsamlegum nótum,“ segir Ingólfur Bender, yfirmaður Greiningar Íslandsbanka. „Mér þykir bankinn taka á versnandi verðbólguhorfum með linkind.“

Bæði greiningardeild Íslandsbanka og greiningardeild Arion banka spá því að verðbólgan verði komin yfir fjögur prósent með haustinu, en það er yfir svokölluðum vikmörkum Seðlabankans um verðbólgumarkmið. 

Seðlabankinn er ekki jafn svartsýnn í verbólguspá sinni. 

Fram kemur í yfirlýsingu peningastefnunefndar að verðbólga muni aukast lítillega á seinni hluta ársins og hjaðna á ný í átt að markmiði í byrjun næsta árs.

Arnór Sighvatsson aðstoðarseðlabankastjóri sagði að bankinn þyrfti að horfa á verðbólguþróun til lengri tíma og að ekki væri hægt að bregðast við launaþróun fyrir fram. 

Ingólfur Bender bendir þó á að aðilar vinnumarkaðarins miði sínar kröfur við verðbólguvæntingar og því þurfi einmitt að bregðast við aukinni verðbólgu áður en gengið er til kjarasamninga. „Ef maður les í orð og aðgerðir bankans virðast þeir ekki vera að bregðast við slæmum horfum.“