Yfir 32 milljarðar í ferðamannagjaldeyri

Erlendir ferðamenn borguðu yfir 32 milljarða króna með greiðslukortum sínum á Íslandi á þriðja ársfjórðungi ársins. Upphæðin hefur aldrei verið hærri í sögunni á einum ársfjórðungi.

Tölur benda til að gjaldeyristekjur af erlendum ferðamönnum á Íslandi hafi verið langt umfram notkun Íslendinga á greiðslukortum sínum erlendis á þessu tímabili.

Fjallað er um málið í Morgunkorni greiningar Íslandsbanka. Þar segir að veltutölur vegna erlendra greiðslukorta gefa sterka vísbendingu um gjaldeyrisflæði vegna ferðamanna. Á þriðja ársfjórðungi, það er í sumar, nam slík velta ríflega 32,4 milljörðum kr. og hefur hún aldrei verið meiri.

Að frádreginni erlendri kortaveltu Íslendinga á tímabilinu hefur gjaldeyrisinnflæði vegna kortanotkunar numið 13 milljörðum kr., sem er einnig met.

Í Morgunkorninu segir að ferðamannaþjónustan sé því að skila umtalsverðum og vaxandi gjaldeyristekjum til landsins, þótt þær virðist ekki hafa dugað til þess að blása nægum vindi í segl krónunnar á nýliðnum ársfjórðungi.