Kostnaður við nýbyggingu íbúða að ná jafnvægi

Ef marka má vísitölu byggingarkostnaðar virðist kostnaður við nýbyggingar íbúðarhúsnæðis vera að ná jafnvægi eftir mikla hækkun í kjölfar falls krónu fyrir liðlega tveimur árum síðan.

Fjallað er um málið í Morgunkorni greiningar Íslandsbanka. Þar segir að samkvæmt nýbirtum tölum Hagstofunnar lækkaði vísitala byggingarkostnaðar fyrir desember um 0,1% frá fyrri mánuði. Hefur vísitalan þá hækkað um 0,9% frá sama mánuði í fyrra, en svo lítil hefur 12 mánaða hækkun hennar ekki verið frá miðju árinu 1993.

Til samanburðar fór 12 mánaða hækkun vísitölunnar mest í nærri 29% í febrúar 2009, og á þenslutímabilinu árin 2004 - 2007 hækkaði hún að jafnaði um 6,8% á ári hverju.

Frá ársbyrjun hefur verðhækkun á innlendu efni verið drýgsti hækkunarvaldur byggingarkostnaðar, en innlent efni hækkaði í verði um 8,4% milli janúar- og desembergilda vísitölunnar. Á sama tímabili hækkaði kostnaður við vélar, flutninga og orkunotkun um 4,6%. Vinnuliður vísitölunnar lækkaði hins vegar á þessum tíma um 6,6%, og svipaða sögu má segja af innfluttu efni sem lækkaði í verði um 2,5% á tímabilinu.

Frá ársbyrjun 2008 hefur kostnaðarverð á fermetra í vísitöluíbúð skv. vísitölu byggingarkostnaðar hækkað um ríflega þriðjung. Á sama tíma hefur verð á fjölbýli á höfuðborgarsvæði lækkað um nærri 14%, ef miðað er við vísitölu íbúðaverðs á höfuðborgarsvæði sem Þjóðskrá reiknar út. Mjög hefur því dregið saman með byggingakostnaði og söluverði íbúða frá því sem var fyrir hrun, jafnvel svo að ekki svari lengur kostnaði að byggja íbúðarhúsnæði til sölu í mörgum tilfellum. Nýbyggingar munu því væntanlega verða með minnsta móti næstu misserin.