Gengið frá sölu höfuðstöðva Orkuveitunnar

Fjármögnun kaupa á höfuðstöðvum Orkuveitu Reykjavíkur, sem var í umsjá Straums fjárfestingabanka, er lokið. Með sölu á fasteigninni eru allir þættir Plans Orkuveitunnar og eigenda fyrirtækisins komnir á áætlun segir í tilkynningu frá Orkuveitunni. Lokið verður við fullnaðarfrágang skjala tengdum sölu og leigu á húsnæðinu á næstu vikum.

Stjórn Orkuveitu Reykjavíkur samþykkti snemma árs kauptilboð í höfuðstöðvar fyrirtækisins að Bæjarhálsi 1 og Réttarhálsi 1 í Reykjavík. Sala þeirra er mikilvægur þáttur í framvindu Plansins, aðgerðaáætlunar Orkuveitunnar og eigenda, með því að lausafjárstaða fyrirtækisins batnar sem söluandvirðinu nemur, segir ennfremur í tilkynningunni. Söluverðið er 5,1 milljarður króna. Straumur fjárfestingabanki gerði kauptilboðið fyrir hönd óstofnaðs félags, með fyrirvara um áreiðanleikakönnun og endanlega fjármögnun. Nú er hvoru tveggja lokið.

Orkuveitan mun leigja húseignirnar til 20 ára og hafa rétt til að kaupa þær aftur eftir 10 ár eða við lok leigutímans.

Haft er beint eftir Bjarna Bjarnasyni, forstjóra, í tilkynningunni sem segir að með sölu höfuðstöðvanna sé eignasala Orkuveitunnar komin á áætlun. Samningurinn sé Orkuveitunni fjáhagslega hagstæður, lausafjárstaðan styrki og dragi úr áhættu í rekstrinum. Þá telur Bjarni mikilvægt að fyrirtækið eigi þess kost að kaupa eignina aftur þyki það skynsamlegt þegar þar að kemur.